Author Archives: einar

Danmörk – Dagur 365…

Í dag er dagur 365 hér í Danmörku. Ég kom hingað 24. ágúst í fyrra og flutti inn í gáminn góða. Margt búið að gerast á síðastliðnu ári. Var fyrst einn hérna í 4 mánuði í gámnum með fólki úr öllum heimshornum. Það var að mörgu leyti mjög skemmtilegt en líka erfitt að vera í burtu frá Karen og Daníel. Búinn að prófa að vinna hjá Microsoft sem var áhugavert að öllu öðru leyti en því að það sem ég var actually að gera var frekar óspennandi. En það var fróðlegt að vinna í svona stóru fyrirtæki, kynnast fólkinu og sjá hvernig hlutirnir ganga fyrir sig þarna. Búinn að vinna sjálfstætt rannsóknarverkefni með öðrum nemanda undir leiðsögn tveggja prófessora, við sendum inn pappír til birtingar í ráðstefnu sem verður í haust, NordSec ’08, og fáum að vita á næstu dögum hvort hann verður birtur þar. Búinn að vinna í skólanum með Dönum, Bretum, Hollendingum, Litháum, Lettum og Pólverjum að allskonar spennandi og óspennandi verkefnum. Ég og Karen erum búin að koma Daníel inná leikskóla, fara til Legolands, þvælast um alla garða og legaplads í Kaupmannahöfn, læra talsvert meira í dönsku og búa til eitt stykki nýtt barn. Í heildina er ég bara mjög ánægður með þetta allt saman, þó að það sé erfitt að mörgu leyti að flytja milli landa þá er það líka áhugavert og gaman að prófa að búa í nýju umhverfi.

Í dag er líka afmælisdagurinn minn, ég er orðinn 28 ára. Eldri en Jimi Hendrix, Kurt Cobain, Jim Morrison og Janis Joplin urðu 🙂 .  Karen fann til fínan morgunverð fyrir okkur í morgun, síðan skruppum við í Fields að kaupa nokkra hluti, m.a. afmælisköku og lentum svo í brjálaðri rigningu á leiðinni til baka, komum inn öll hundblaut. Vorum svo bara þrjú saman með afmæliskaffi en fáum nokkra gesti í kvöld, Öglu og Ragga, Ebbu og Hilmar, og Hildi og Gúnda. Maður má víst samt ekki vera of lengi að í kvöld því maður verður að vakna til að sjá handboltann á morgun þar sem við munum að sjálfsögðu vinna gullið!!!

Blogg sumarfrí búið

Jæja, þá eru komnir 2 mánuðir síðan ég setti eitthvað síðast inná þessa síðu. Hef verið að spá í hvort ég ætti að loka henni þar sem ég nenni næstum aldrei að skrifa neitt, en ákvað að halda þessu áfram og reyna að skrifa aðeins oftar, svona einu sinni í viku. Mér finnst gaman að lesa þetta sjálfum eftir nokkur ár.

Hvað gerðist svo í sumarfríinu? Daníel byrjaði á leikskóla 1. júlí þannig að við slepptum plönum um að ferðast mikið í júlí, leyfðum honum frekar bara að aðlagast leikskólanum í rólegheitunum. Leikskólinn heitir Grøftekanten, við köllum hann grafarkantinn, og hann er bara hinum megin við götuna. Daníel er hæstánægður þarna þó hann geti ekkert talað við hina krakkana og er rosa duglegur að leika sér allan daginn með þeim. Ég og Karen höfum bara talað dönsku við fóstrurnar sem er ágætis æfing fyrir okkur, sérstaklega þar sem við þekkjum eiginlega enga Dani hérna! Meðan Daníel var í aðlögun vorum ég og Karen bara að njóta frísins, ég var ekkert að vinna í sumarfríinu. Vorum bara barnlaus í stórborginni, erum búin að vera mikið niðrí bæ, borða úti, fara á bíó kl. 11 um morgun o.fl. Mikið stuð.

Svo var það Íslandsferðin. Við fórum í 2 vikur til Íslands í enda júlí. Það var fínt en soldið skrýtið. Í fyrsta lagi finnst manni allt í einu íslenska landslagið soldið spes. Þessi endalausa auðn og engin tré og svona, eitthvað sem ég hef aldrei pælt í fyrr, fannst mér allt í einu voða flott þegar við komum til baka. Við bjuggum hjá Tomma og Siggu í 3 nætur eftir að við komum, svo fórum við með mömmu og pabba í brekkuskóg í nokkra daga og svo bjuggum við seinustu vikuna aftur hjá Tomma og Siggu. Okkur tókst að hitta held ég alla sem við ætluðum að hitta og skemmtum okkur bara vel. Samt fannst mér líka mjög fínt að koma aftur hingað til Danmerkur eftir ferðina 🙂

Eina leiðinlega við Íslandsferðina var að við þurftum að eyða allt of miklu af henni í stúss í sambandi við íbúðina okkar. Í júlí kom það nefnilega upp að það var myglusveppur á baðherberginu hjá okkur. Leigjendurnir okkar voru ósátt við það og sögðu upp og fluttu út. Við fengum svo iðnaðarmenn til að koma, rífa niður flísar af baðinu, taka mygluna og flísaleggja aftur. Þarna hefði þetta átt að vera búið. En nei, píparinn sem gerði þetta klúðraði þessu einhvernveginn þannig að það fór að leka bakvið trévegginn sem flísarnar voru á, og lak gegnum gólfið niður til nágranna okkar. Þannig að við vorum í sambandi við tryggingarnar, smiði og pípara meðan við vorum heima, veggurinn var rifið í sundur og klósettið, vaskurinn og baðkarið rifið út. Augljóslega gátum við ekki leigt íbúðina aftur út í þessu ástandi þannig að við fengum leigumiðlun til að gera það fyrir okkur. Ef einhvern vantar 4 herbergja íbúð í grafarvogi endilega hafið samband! Anyway, þetta tók endalausan tíma af því sem átti að vera fríið okkar sem var frekar pirrandi.

Þetta er að verða ágætt held ég. Nóg skrif fyrir næstu tvo mánuði. Eitt enn. Fyrir þá sem ekki vita þá eigum við von á öðru barni í desember. Við fórum í fyrsta sinn í sónar síðasta föstudag hérna í Danmörku og fengum nokkrar myndir, m.a. þessa glæsilegu þrívíddarsónar mynd sem er hér fyrir neðan:

Loksins að komast í frí.

Punktablogg þar sem ég nenni ekki að tengja þetta saman.

  • Skilaði inn verkefninu í Biometric systems í dag og er þar með búinn með alla áfanga. Nú á ég bara eftir að vinna á sunnudaginn og mánudaginn og þá er ég kominn í sumarfrí í tvo mánuði.
  • Luke, sá sem ég vinn með hefur það fyrir vana að skrifa á töfluna í skrifstofunni okkar ýmis kvót sem honum finnast fyndin. Núna stendur efst á töflunni okkar “Since the dawn of time man has dreamt of destroying the sun!”. Restin af töflunni er full af jöfnum, formúlum og algóriþmum. Fólk sem kemur í fyrsta sinn inná skrifstofuna okkar gæti alvarlega misskilið hvað verkefnið okkar gengur útá. (Smørrebrød í verðlaun fyrir þann sem þekkir kvótið).
  • Við fórum í fyrsta skipti til Svíþjóðar á mánudaginn, tókum lestina yfir Øresund til Malmø. Það var gaman. Besti parturinn var að í Svíþjóð eru Subway staðir sem við erum búin að sakna hérna á Danmörku. Ansi dýrt að fara til Svíþjóðar bara til að fá Subway reyndar…
  • Á forsíðunni á Urban í dag var fyrirsögnin “Nasista-barnaníðingur handtekinn fyrir að skipuleggja hryðjuverk!”. Þetta hlýtur nú bara að vera versti maður í heimi! Hvað gæti verið verra en nasista-barnaníðingur? Sem skipuleggur hryðjuverk í þokkabót!!
  • Ég hef gegnum tíðina reynt að fylgjast með helstu tækninýjungum, og nýtt mér margar þeirra s.s. veraldarvefinn og rafpóst. Núna nýlega skráði ég mig á vefsíðu sem ég hef heyrt að sé mjög vinsæl hjá ungdómnum og nefnist “Facebook” uppá ensku. Á þessari svokölluðu “Facebook” getið þið fundið mig á slóðinni http://www.facebook.com/profile.php?id=808179882 og addað mér ef þið þekkið mig og ég hef ekki nú þegar addað ykkur.
  • Venjan hjá Dönum sem eru að útskrifast með stúdentspróf er að leigja pallbíla fyrir hóp af fólki, standa svo öll á pöllunum með stúdentshúfurnar, keyra um bæinn og öskra og flauta á fólk. Bærinn var fullur af svona bílum í dag.
  • Atli frændi kom í heimsókn í dag og kom með osta og nammi frá Íslandi. Danir hafa ekki fattað hvað lakkrís með súkkulaði utanum er mikil snilld, ekkert þannig nammi fæst hérna sem er ömurlegt. Reyndar getur maður fengið 3-4 tegundir af íslensku nammi í Irma en það er eini staðurinn.

Skrýtnir danir

Furðuleg lífsreynsla í dag. Ég var með Daníel á aðallestarstöðinni og var að leyfa honum að keyra í einhverjum svona bíl sem ruggast til og frá. Bíllinn var fyrir framan þrjá svona ljósmyndaklefa þar sem maður getur tekið passamyndir af sér. Meðan ég var að bíða eftir að þetta kláraðist þá sá ég karl koma labbandi í áttina að klefunum. Hann hefur verið svona 60-og eitthvað, leit ekki út fyrir að vera róni, en var samt frekar svona skrýtinn eitthvað, labbaði t.d. allur mjög stífur, það var næstum eins og hann hefði engin liðamót í hnjánum. Anyway, hann fer inní klefann og dregur fyrir, ég er ekki að horfa á hann en heyri allt í einu hljóðið í vatni vera að renna niður. Ég lít við og sé að hann er að PISSA Í KLEFANUM, BEINT OFAN Á STÓLINN! Það var dregið fyrir svo ég sá bara fæturna á honum, aðeins í stólinn og sprænuna að lenda á stólnum! Svo kom hann út og labbaði í burtu. Ég hafði engan sérstakan áhuga á að fara að abbast eitthvað uppá gaur sem pissar í ljósmyndaklefa, var líka með Daníel og svona þannig að ég fór bara í miðasöluna þarna og lét þau vita. Veit svosem ekki hvað ég hefði átt að segja, “uhh, du skalt ikke pisse i den her pasfoto! Det er ikke toilet!”. Eða bara “Hold kjæft mand, er du sindsyg??!?”. En já, þetta var, öh, spes.

Annars kláraði ég síðasta prófið í dag, áfanga dauðans, System Integration. Gekk betur en ég vonaði þannig að ég er sáttur. Nú er bara að vinna á fullu í vinnunni og svo í næstu viku byrjar Biometric systems áfanginn sem ég verð í þrjár vikur í.

(Ég flokka þessa færslu undir Danmörk, Skóli, DTU og í nýjum flokki sem heitir Piss í ljósmyndaklefum. Ég verð mjög hissa ef sá flokkur fær einhverntímann fleiri færslur)

Home alone

Karen og Daníel fóru til Póllands í fyrradag og verða þar í sex daga, heimsækja fjölskylduna og svona. Á meðan er ég heima í prófum og get einbeitt mér að þeim, það er ágætt. Var í fyrsta prófinu í dag, Distributed systems, það gekk svona sæmilega, ekki mjög vel. Mjög langt próf með mörgum spurningum sem þurftu stór svör. Prófið var í 4 tíma og ég var að skrifa alveg fram á síðustu mínútu. Svo fer ég í Network Security á fimmtudaginn og svo System Integration (gubb) 3. júní. Í júní tek ég svo þriggja vikna kúrs sem heitir Biometric systems, hann eru um svona tækni sem les fingraför, augnskanna og þess háttar dót. Plús ég þarf að vinna fullt í vinnunni til að skila einhverju gagnlegu af mér í enda júní þegar ég hætti að vinna. Þannig að, rúmur mánuður af mikilli vinnu í viðbót og svo tveggja mánaða frí! Vá hvað ég hlakka til. Ætla ekkert að vinna í júli og ágúst. Við komum í 2 vikur til Íslands í enda júlí og ætlum líka að ferðast eitthvað um hérna í Danmörku og svona.

Sit núna og horfi á danskt standup í sjónvarpinu. Væri kannski fyndið ef ég gæti skilið það, núna skil ég svona 30% af því sem þeir segja. Þetta er nú alveg stórfenglega óspennandi blogg þannig að ég læt fylgja hérna með eitt gott youtube myndband. Þetta er gaur að herma eftir Tom Cruise scientology myndbandinu (sem má sjá hér ef einhver hefur ekki ennþá séð það). Ég og Luke sem er að vinna með mér vorum að horfa á þetta saman í vinnunni og höfum síðan verið að nota endalausa frasa úr þessu, sem hljóma eflaust mjög ófyndnir ef maður hefur ekki séð myndbandið :). En já, hér er það:

Danskt punktablogg

Punktablogg í þetta skiptið.

  • Ég náði í Nintendo emulator á netinu í dag, og í kvöld erum ég og Karen búin að vera að rifja upp alla gömlu góðu leikina. Þetta er eitthvað sem ég geri á nokkurra ára fresti og fæ æði fyrir því í nokkra daga. Náði núna í 894 leiki og er búinn að prófa alla þessa helstu, Megaman 2, Track’n’Field, Double Dragon 2, Paperboy, Tecmo NBA Basketball (besta leik ever!) o.fl. Tengdi tölvuna við sjónvarpið þannig að þetta var bara eins og í gamla daga. Nú vantar bara að kaupa joystick og þá er þetta fullkomið!
  • Ætlum að hafa páskamorgunmat á páskadag eins og venjan er hjá okkur heima á Íslandi, Agla, Ebba og Hilmar ætla að koma og vera hjá okkur. Fengum sent kókópöffs og páskaegg frá Íslandi til að fullkomna stemmninguna.
  • Múmínálfarnir. Af hverju heitir stelpan ekki múmínstelpa? Það er múmínpabbi, múmínmamma, múmínsnáði og svo heitir hún snorkstelpan! Hvað er snork???
  • Ég er 27 ára gamall, fullorðinn samkvæmt öllum stöðlum en samt er ég spenntur fyrir Nintendo, kókópöffs og múmínálfunum. Kannski er ég þroskaheftur.
  • Lenti enn einu sinni í því að dönsk afgreiðslustelpa skildi ekki hvað ég var að biðja um.
    “Må jeg bede om en smørkage?”
    “En HVAD?”
    “En smørkage, uh, smøørkaaage, smøørkeeee…”
    “Oh, du mener SMØRKAGE!”.

Þetta video frá Jóni Gnarr lýsir þessu betur. Nákvæmlega þessu hef ég lent í OFT síðan ég kom hérna. Danir bara geta ekki skilið mann nema maður segi orðið nákvæmlega rétt!

Ný vinna, þorrablót og dönsk tækni

Jæja, þá er ég búinn að skipta um vinnu. Ég var búinn að pæla í því í smá tíma að hætta hjá Microsoft, 15 tímar á viku (+ 4 í samgöngur) var of mikið en ég vildi ekki hætta alveg og vera ekki með nein laun lengur. En svo benti Luke (sem er með mér í skólanum) mér á að það var verið að óska eftir masters nemum í DTU til að vinna ákveðið verkefni í skólanum, 1 dagur í viku og ágætis laun þannig að ég ákvað að sækja um það með Luke. Ég sagði upp hjá Microsoft og fékk að hætta undireins, yfirmaðurinn var mjög fínn, reyndi að fá mig til að vera áfram en sagði mér svo bara að láta sig fá uppsagnarbréf þar sem ég segðist mundu vinna næstu 2 vikur, því ef ég hætti samstundis gæti það haft áhrif ef ég vildi einhverntímann sækja um aftur. Þó ég segðist ætla að vinna 2 vikur í viðbót þurfti ég ekkert að mæta og gat þess vegna byrjað strax í nýju vinnunni. Nýja verkefnið er partur af stærra rannsóknarverkefni, okkar partur gengur útá að skoða hvernig sé hægt að nota Aspect oriented programming og static analysis til að bæta öryggi í existing kerfum. Við fáum skrifstofu með 2 öðrum mastersnemum sem er algjör snilld þar sem maður getur líka notað hana til að læra fyrir önnur fög og hefur stað til að geyma dótið sitt og svona. Ég vinn í þessu 1 dag í viku framí júní og þá sjáum við til með framhaldið.

Annars er allt fínt að frétta bara. Síðasta föstudag buðum við Luke, Giedrius og Rimanda í mat til okkar. Giedrius er strákur frá Litháen sem er með mér í skólanum og var að vinna hjá Microsoft, Rimanda er kærastan hans. Á laugardaginn fengum við svo Öglu til að passa fyrir okkur og fórum með Ebbu, Hilmari, Rakel og einhverjum vinum Ebbu og Hilmars á þorrablót hjá Íslendingafélaginu. Það var ágætt, skrýtið að vera allt í einu með eintómum íslendingum aftur. Hljómsveitin hefði samt mátt vera betri til að fá betri stemmningu. En það var gott að komast út, þetta var í fyrsta skipti sem við höfum farið eitthvert saman út síðan við komum til Danmerkur.

Ég ætla að bæta við nýjum föstum lið á þessa síðu. Þetta er nýr dálkur sem heitir Dönsk tækni dagsins þar sem ég mun segja frá æsispennandi dönskum tækninýjungum eins og peningafæriböndum, skiptimyntarvélum og fleiru sniðugu.

Dönsk tækni dagsins:

Við fengum okkur að borða í Fields á svona skyndibitastað. Í staðinn fyrir að fá númer og vera kölluð upp þegar maturinn er tilbúin fengum við svona smá flögu einhverja til að taka með okkur. Þegar maturinn okkar var tilbúinn þá pípti flagan og blikkaði ljós á henni. Snilld!

Danmörk – Dagur x

Er ekki kominn tími á að hætta að telja dagana? Það er bara svo hentugt þar sem mér dettur aldrei í hug neinir titlar á þessar færslur. Karen og Daníel eru komin hingað út núna og við erum flutt inní íbúðina í Birketinget. Fyrstu dagarnar voru ansi tómlegir þar sem við vorum bara með einn svefnsófa og ekkert annað í íbúðinni. En síðustu helgi fengum við svo Öglu til að passa fyrir okkur og fórum í massífa verslunarferð í IKEA þar sem við keyptum rúm, borðstofuborð, sófaborð, sjónvarpsborð, kommóðu og heilan helling af smádóti. Fórum svo og keyptum okkur fínt sjónvarp á mánudaginn og fengum internettengingu og á þriðjudaginn kom allt dótið okkar frá Íslandi. Þannig að núna er þetta bara orðið mjög heimilislegt og fínt. Ansi mikið skemmtilegra að búa hérna í alvöru íbúð með fjölskyldunni heldur en að búa einn í hálfum gámi, þó það hafi nú verið ágætis lífsreynsla í nokkra mánuði. Var að klára 3 vikna janúarnámskeiðið í gær og er kominn í frí í skólanum í 10 daga sem er mjög fínt.

Að öðru: tæknimálum! Það kemur sífellt út nýrri og flottari tækni: iphone, hdtv, blue ray o.s.fv. Ekkert af þessu vekur samt jafnmikinn áhuga hjá mér og öll tæknin sem er í matvörubúðum í Danmörku! Það er rosalegt! T.d. í Kvickly sem er local búðin okkar, þar er súpercool peningafæriband! Á öllum svona búðarkössum er svona, öhh, spýta sem skiptir kassanum í tvennt svo það sé hægt að aðskilja það sem þú og sá næsti á eftir þér eruð að kaupa. Í Kvickly kemur uppúr þessari spýtu smá pinni og ofan á honum er smá járn skál. Þegar þú stendur við endann á kassanum, og ert að setja í poka þá geturðu bara sett peninginn þinn í skálina, afgreiðslumanneskjan ýtir á takka og swooooosh, skálin með peningunum þínum skýst til afgreiðslumanneskjunnar. Hún setur svo afganginn þinn og kvittunina aftur í skálina og swooooosh, það skýst til baka til þín. Maður verður eiginlega að sjá þetta til að fatta hvað þetta er stórfenglegt! Í Fakta eru þeir svo búnir að þróa afgreiðslukerfið svakalega! Ef maður borgar með seðli þá lætur afgreiðslumanneskjan hann inní einhvern töfrakassa, svo er annar töfrakassi fyrir framan þig sem gefur þér sjálfkrafa klink til baka. Þegar ég vann í 10-11 þurfti maður a.m.k. að slá inn rétta upphæð og geta talið smápeninga til að geta gefið til baka, núna þarf afgreiðslufólkið basically bara að hafa púls og þá getur það unnið þarna. Ísland er mörgum árum á eftir Danmörku í búðarkassatækni!

Spurt og svarað

Þessi síða hefur hingað til snúist aðallega um nokkra hluti: forritun, kvikmyndagetraunir, almennt nöldur og tuð og svo hefðbundar dagbókarfærslur (… í dag fór ég í Kringluna og keypti mat…) sem eru bara áhugaverðar fyrir örfáa aðila. Hinsvegar kemur reglulega fólk hingað inn sem hefur leitað að einhverju í Google eða öðrum leitarvélum og verið vísað hingað. Stundum finnur það sem það er að leita að, en oft er það að leita að einhverju sem þessi síða hefur engin svör við. Af þessu tilefni (og af því að mér leiðist hrikalega) hef ég ákveðið að taka nokkra af þeim leitarfrösum sem hafa lent hérna síðustu mánuði og svara þeim svo það geti e.t.v. hjálpað öðrum í framtíðinni.

graenmeti
Fylltu einn þriðja af diskinum með því.

Hvar getur maður fundið símanúmer
Í símaskránni, eða ja.is á netinu.

Læknavaktin (165 fyrirspurnir)
Ég er ekki hrifinn af henni.

Rúmteppi (37 fyrirspurnir)
Prófaðu að fara í IKEA og fá þér svo sænskar kjötbollur á eftir.

ironic
Hérna er skilgreining á hvað er ekki ironic.

danmörk dtu blogg, DTU danmörk blogg
Þú ert á réttum stað, kíktu á færslurnar sem eru merktar með taginu DTU.

ég veit þér finnst ég of feit, þú bauðst mér aldrei á deit
Greinilega Nylon aðdáandi, kíktu á þessa færslu fyrir fleiri dæmi um góða Nylon texta.

Ariston, Ísskápur (og afbrigði af því, 100 fyrirspurnir)
Okkar Ariston ísskápur hefur virkað vel, mæli með þeim. (Og greinilegt að planið mitt er að virka!).

februar
Öhh, annar mánuðurinn í árinu, 28 dagar nema á hlaupárum, þá eru þeir 29. Veit ekki hvað meira er hægt að segja um hann?

strcpy
Notaðu strncpy í staðinn til að sleppa við buffer overflow.

guðmundur og geirfinnur
Kíktu á http://mal214.googlepages.com/, þar er manneskja sem er með þetta allt á hreinu.

tennis orð
spaði, bolti, Boris Becker.

MSN bot
Kíktu á http://tech.einaregilsson.com/projects/windows-live-bot.

spiderman 12
Ekki komin út, nýjasta myndin er Spiderman 3, sem var frekar slöpp. Um leið og Spiderman varð svartur gat hann dansað! Dulinn rasismi!

welcome to the jungle þýðing
Samkvæmt þessari þýðingarvél er fyrsta versið svona:

Velkominn til the frumskógur Við got gaman ‘n’ leikur
Við got allt þú vilja
Hunang við vita the nafni
Við ert the fólk þessi geta finna
Hvað sem þú mega þörf
Ef þú got the peningar hunang
Við got þinn sjúkdómur

Sjá fulla þýðingu hér.

skírn heilræði, heilræði við skírn
Hafðu snuð við hendina ef barnið fer að gráta þegar það er skvett vatni á það. Hafðu líka aukableyju við hendina. Ekki skíra barnið Svarthöfði.

verg þjóðarframleiðsla, hvað er verg framleiðsla, verg, vergur óhreinn mengaður (21 fyrirspurn)
Ósk útskýrir það ágætlega í kommentunum við þessa færslu.

góð kvót
“Intet er så godt at det ikke er skidt for noget”

hvernig segir maður 80 á dönsku
firs

Fyndin kvót
“Necessary?? Is it neccessary for me to drink my own urine? Probably not. But I do it because it’s sterilized and I like the taste”. Mini kvikmyndagetraun, jolly cola í verðlaun.

“Ég bít ekki á ryðgaðan öngul”
Ég mæli með því að bíta alls ekki á neinn öngul. Jafnvel ryðfríir önglar geta valdið alvarlegum skaða í munnholi ef maður bítur í þá.

cybercity 2002 (3 fyrirspurnir)
Hér má finna umræðu um þennan glæsivef og afrit af honum.

kennitalan mín
Kíktu aftan á debetkortið þitt.

steinbitsburrito
Örn kokkur hjá TM Software getur gefið þér uppskrift af því.

þriggja blaðsíðna ritgerð
Hafðu fyrstu blaðsíðuna forsíðu, næstu efnisyfirlit og þá þriðju heimildaskrá, þá ætti þetta ekki að taka langan tíma.

klám, klám password, simpsons klám, hommaklám, gott klám (15 fyrirspurnir)
Nágranni okkar í Svarthömrum rekur síðuna klam.is (og er með bílinn sinn merktan henni í bak og fyrir). Prófaðu það. Veit reyndar ekki hvort þar er að finna gott Simpsons hommaklám (Smithers?) en það má a.m.k. athuga það. (Hver leitar annars að “gott klám”? “Ég vill ekki neitt drasl klám, ég vill bara gott klám! Alvöru leikstjórn og búningahönnun eru skilyrði!”).

tölvugrafík verkefni, verkefni opengl (5 fyrirspurnir)
Hér og hér eru mín verkefni, en kóðinn er ekki innifalinn, þú verður að skrifa hann sjálfur.

alda en wannes, alda belgíu
Kíktu á http://aldaegils.blogspot.com.

töff setningar
“Good luck at the bad timing awards”. Önnur mini kvikmyndagetraun, Haribo í verðlaun.

bubbi rapp, bubbi í rapp, bubbi nýtt rapp lag, bubbi rappa yo
Maður með svona skelfilegan sérstakan tónlistarsmekk hefði kannski gaman af þessu lagi.

matlock on dvd
Matlock varði alltaf bara saklaust fólk. Nema í einum þætti þá var skjólstæðingurinn sekur, og þá sýndi Matlock sjálfur fram á það í réttarsalnum. Ég held hann hafi aðeins misskilið hlutverk sitt sem lögfræðingur sakborningsins. En já, kíktu á Amazon.

skattkort danmörk
Mættu bara á næstu skattútibú með atvinnusamninginn þinn og þeir redda þessu á staðnum. Getur líka kíkt á skat.dk.

Ef fólk vill fá fleiri ráðleggingar eða svör við spurningum er velkomið að senda mér þær í pósti.

Kominn aftur til Danmerkur

Þá er fyrsta önnin í DTU búin. Ég var í fjórum áföngum, í Robust Programming þurfti ég að skila inn verkefni og skýrslu, í Program Analysis fór ég í munnlegt próf, í Computationally Hard Problems fór ég í hefðbundið skriflegt próf og í Web Services var hópurinn minn með kynningu. Þetta gekk allt saman ágætlega, þó ég sé ekki búinn að fá neinar einkunnir ennþá. Kennarinn okkar í Web Services var reyndar mjög pirraður í byrjun því við höfðum skráð eitthvað vitlaust hver bar ábyrgð á hverju, röflaði um það í 5 mínútur í byrjun kynningarinnar. Spurði svo mjög skrýtinna spurninga og spurði einn okkar engra spurninga sem var frekar skrýtið. Einkunnirnar ættu síðan að koma fljótlega eftir jól. Ekki að þær segi manni mikið þar sem DTU er með einhvern þroskaheftan sérstakan einkunnaskala sem er einhvernveginn -3 0 4 X ϖ 8 麽 12. Kannski ekki nákvæmlega svona en er allavega frá -3 uppí 12 með bilum á hinum ýmsu stöðum.

Ég fann svo loksins íbúð í Danmörku viku áður en ég kom heim til Íslands. 85 fm, með alvöru baðherbergi með baðkari, fínni stofu og hægt að labba útí garð úr stofunni. Er á Amager, nálægt Íslandsbryggju. Tekur mig reyndar næstum klukkutíma að komast í skólann en ég verð bara að nýta tímann í lestinni vel. Myndir af íbúðinni má sjá á http://einaregilsson.com/birketinget.

Ég fór til Íslands 17. des og var þar yfir jólin og áramótin. Mjög fínt að komast aðeins heim. Þó það sé fínt að vera hérna úti þá finnur maður hvað það er allt eitthvað auðvelt og þægilegt þegar maður kemur aftur heim. Maður skilur allt og allir skilja mann, maður veit hvernig allt virkar og svona. Jólin voru fín, vorum hjá mömmu og pabba á aðfangadag og fengum svo Tómas og strákana til okkar á jóladag. Þetta voru fyrstu jólin þar sem Daníel skilur eitthvað hvað þetta gengur útá. Hann fékk í skóinn og var spenntur fyrir því og svo var hann mjög spenntur að opna pakkana á aðfangadag. Við reyndar létum hann opna suma þeirra á jóladag þar sem hann var orðinn pakkaóður á aðfangadag og leit varla á hvað var í pökkunum, vildi bara komast í næsta pakka sem fyrst. Svo vorum ég og Karen að ganga frá íbúðinni og svona, flytja allt í búslóðageymslu og ganga frá. Sendum dótið okkar út með Samskipum, þar sem við tökum engin húsgögn með þá var þetta voða lítið, bara 1,66 rúmmetrar, þó okkur hafi reyndar þótt það vera fullt þegar við vorum að pakka. Ég kom hingað til Danmerkur í dag en Karen og Daníel koma svo 15. jan og þá þarf ég að vera búinn að kaupa rúm og svona, búslóðin kemur svo 21. eða 22. jan.

Ég byrja svo í janúar áfanga á morgun kl. 9 og fer beint að vinna eftir það þannig að það er nóg að gera. Nú er hinsvegar bara planið að slappa aðeins af í kvöld, horfa kannski á Næturvaktina og fara svo að sofa snemma. Maður verður líka að jafna sig á tímamuninum, það getur nú tekið nokkra daga…