Category Archives: Danmörk

Ný vinna á morgun

Jæja, fyrsti vinnudagurinn á morgun. Ég mæti kl. 10, og klukkan 13 byrjar svo julefrukost, sem er framá nótt samkvæmt nýja yfirmanninum mínum. Þetta ætti að verða fínn fyrsti dagur. Ég efast reyndar um að ég verði neitt mjög lengi í julefrukostinum, þar sem ég þekki engan þarna ennþá eða neitt.

Var annars að klára síðasta prófið á mánudaginn. Það var munnlegt próf í kúrsinum Process Modelling & Validation. Gekk bara vel, nú á ég bara eftir að fá einkunnir úr hinum tveimur áföngunum mínum. Skrýtið að vera búinn með alla áfanga sem ég mun taka hérna, mér finnst ekki svo langt síðan ég byrjaði. En samt gott, það verður fínt að geta einbeitt sér að einu verkefni eftir jól, og þurfa ekki að hafa áhyggjur af verkefnaskilum og prófum (ehemm, nema einum ansi stórum verkefnaskilum í júlí…).

Síðan erum við bara að bíða eftir að barnið láti sjá sig. Viljum helst að það komi strax. Karen veðjaði á 9. desember og ég á 11. (daginn í dag) svo við erum bæði búin að tapa, nema eitthvað svakalegt gerist á næstu 46 mínútum…

Ný vinna, masters verkefni og fleira

Það er ýmislegt búið að gerast síðan ég skrifaði hérna síðast. Það er búin að vera mikil óvissa hjá okkur síðustu vikur um framhaldið hérna í Danmörku. Eftir að við náðum loksins að leigja út íbúðina okkar heima var öruggt að við mundum a.m.k. ekki koma heim strax, en síðan þá er óvissan búin að snúast um hvort Karen fengi einhvern fæðingarstyrk og hvort ég gæti þá tekið mastersverkefnið í vor eða hvort ég þyrfti að fresta því og finna mér fulla vinnu í nokkra mánuði. En loksins eftir endalausar heimsóknir hjá Karen í ráðhúsið, þar sem hún hefur verið send fram og til baka og verið í endalausu veseni þá er komið í ljós að hún fær víst fæðingarstyrk. Það virðist vera reglan hjá opinberum starfsmönnum hérna að hjálpa eins lítið og þeir mögulega geta, og sérstaklega benda þeir manni aldrei á neitt að fyrra bragði. Það plús að deildir í ráðhúsinu eru opnar á mismunandi tímum og eru ekki opnar lengi hefur valdið því að þetta hefur allt saman verið hrikalega langt og leiðinlegt vesen. En núna með fæðingarstyrknum + hlutavinnu hjá mér + húsaleigubótum + 2x barnabótum + fríplássi á leikskóla ættum við að geta látið þetta ganga þangað til í sumar þegar ég klára og get fengið mér alvöru vinnu.

Hlutavinnan sem ég er komin með er hjá dönsku hugbúnaðarfyrirtæki sem heitir Maconomy. Ég fór á kynningu hjá þeim fyrir nokkrum vikum og leist vel á. Ég sendi svo inn umsókn og fór í tvö viðtöl og fékk svo hlutastarf. Ég byrja í einhverri test deild og fer svo sennilega í forritunarstöðu í vor þegar þeir fara að endurskrifa einhvern server sem þeir eru með.

Fyrir utan það er ég kominn með Masters verkefni. Er búinn að finna leiðbeinanda sem ég er mjög sáttur með og eftir að tala við hann í gær kom ég með tillögu sem honum leist vel á. Nú þurfum við að fylla út eitthvað form og láta samþykkja tillöguna, en ég geri ráð fyrir að það sé ekkert mál fyrst þetta er eitthvað sem honum þykir vænlegt. Verkefnistillagan hefur titilinn ‘PLR: A Process Language Runtime for the .NET platform’ og gengur útá að útfæra process calculus mál eins og CCS og CSP í .NET. Nánar tiltekið að búa til runtime sem einfaldar að útfæra svona mál (sambærilegt við Dynamic Language Runtime) og útfæra svo 2 mál sem proof-of-concept til að sanna að þetta virki.

Fyrir utan þetta allt saman erum við svo bara að bíða eftir barninu sem á að koma 17. desember en við erum að vonast eftir að komi fyrr. Erum orðin óþolinmóð og viljum helst fá það bara í byrjun Desember. Karen vill reyndar fá það strax en ég vill að það komi daginn eftir síðasta prófið mitt :).

Kaupmannahöfn – Borg óttans

Síðustu vikur hafa verið skotárásir hérna á svona 2-3 daga fresti í Kaupmannahöfn. Það er semsagt gengjastríð í gangi milli “rokkara” (sem eru semsagt Hells Angels) og innflytjenda (eða “manna með innflytjendabakgrunn” eins og þeir kalla það hérna). Miðað við hvar við búum ættum við nú kannski að standa með innflytjendunum þar sem hverfið okkar er örugglega svona 60-70% innflytjendur. Sala á skotheldum vestum er líka búin að aukast um 800%, kannski maður ætti að splæsa í svoleiðis?

Við flytjum inní nýju íbúðina á næstu dögum, nú er bara spurning um hvenær við getum fengið lyklana. Ég var rétt í þessu að hringja í húsvörðinn og skilja eftir skilaboð á símsvaranum. Mér finnst mjög fínt að tala dönsku við símsvara, miklu betra en að tala við alvöru fólk. Ef ég ég fengi að ráða mundi ég aldrei tala við fólk, bara skiptast á símsvaraskilaboðum. Það eru allir búnir að bjóðast til að hjálpa okkur við flutningana þannig að þetta ætti nú að ganga fljótt og vel. Við ætlum að leigja sendiferðabíl þannig að við getum gert þetta sjálf í rólegheitum, þá fæ ég líka að prófa að keyra hérna sem verður áhugavert.

Annars er danskan öll að koma til hjá bæði mér og Karen. Við vorum hjá ljósmóður í dag, sú íslenska sem við höfðum var veik svo það voru 2 danskar í staðinn. Karen talaði við þær um allt á dönsku eins og ekkert væri. Ég fór líka í fyrsta sinn að tala við prófessorana mína í skólanum á dönsku um daginn og það gekk bara vel. Einu skiptin sem við tölum orðið ensku við dani núna er ef það er eitthvað mjög mjög mikilvægt sem við viljum ekki misskilja eða kunnum alls ekki að segja á dönsku. Ég les líka dönsk dagblöð á hverjum degi og hef verið að hlusta á danskt útvarp í lestinni, sérstaklega eina stöð þar sem er bara tal. Þetta er reyndar hundleiðinlegt stöð en þeir tala frekar skýrt, nú veit ég allt of mikið um einhverja Lene Espersen sem er að taka við sem formaður hjá konservatíva flokknum og hvernig hún mun standa sig í samanburði við Bendt Bensen. Þegar ég kem heim ætla ég svo að verða svona óþolandi dana íslendingur sem segir altså, faktískt og interessant í öðru hvoru orði. Ég er meira að segja sjálfviljugur að downloada plötu með Kim Larsen (eða best-of Gasolin, gömlu hljómsveitinni hans). Ef einhver hefði sagt mér það fyrir 10 árum hefði ég sagt að þeir væru eitthvað klikkaðir. Er einmitt að hlusta á plötuna núna, nánar tiltekið þetta lag:

Húsnæði, Íslandsferð og fleira

Húsnæðismálin eru búin að reddast hjá okkur, a.m.k. hérna í Danmörku. Við enduðum á því að hafa samband við Sigrúnu Þormar, sem vinnur við það hérna í Danmörku að hjálpa Íslendingum að finna húsnæði, gera skattaskýrslu, sækja um bætur og bara hvað sem er. Við báðum hana sérstaklega að athuga hvort það væri laus íbúð í húsi í Frederiksberg þar sem vinir okkar búa. Hún fann íbúðina fyrir þau, og þau höfðu sagt okkur að það væru lausar íbúðir þannig að hún reddaði þessu og við getum flutt inn 1. október. Íbúðin er frábær, tvö svefnherbergi, þvottavél+þurrkari inní íbúðinni, uppþvottavél í eldhúsinu og allt mjög snyrtilegt og fínt. Svo er lokaður garður þar sem maður getur farið út með Daníel, það búa líka nokkrar aðrar íslenskar fjölskyldur þarna þannig að kannski eru einhverjir krakkar sem hann getur talað við. Húsnæðismálin á Íslandi eru hinsvegar ekki nógu góð, við erum ennþá ekki búin að leigja aftur út okkar íbúð. Ef einhver veit um einhvern sem er að leita að 4 herb íbúð í tæpt ár, þá endilega hafa samband.

Talandi um Ísland, ég og Daníel komum í stutta Íslandsferð 11.-15. október. Þá er ég í haustfríi og við ákváðum að nýta tækifærið og kíkja í heimsókn. Karen kemur ekki með þar sem konur sem eru komnar svona langt eiga ekki að fljúga. Við nýtum örugglega ferðina líka til að byrgja okkur upp af íslensku nammi og svona. Þannig að, sjáumst í október 🙂

NordSec ’08 og íbúðarleit

Ég og Luke fengum niðurstöðuna úr verkefninu okkar og pappírinn okkar verður birtur í ráðstefnuriti fyrir ráðstefnuna ‘13th Nordic Workshop on Secure IT Systems‘ eða NordSec ’08. Fengum review frá þremur gaurum sem voru svona ágæt, ekkert æðisleg en nógu góð til að pappírinn verður birtur. Nú þurfum við að laga pappírinn eitthvað til skv. athugasemdum og skila inn lokaútgáfu 24. sept. Ráðstefnan er svo haldin í DTU 9-10. okt og þá verðum við með einhverja smá kynningu. Að halda kynningar er nú ekki eitthvað sem mér finnst gaman en maður hefur sjálfsagt gott af því.

Annars erum við bara á fullu núna að leita að nýrri íbúð. Við missum þessa íbúð í lok september þannig að þetta er farið að verða svolítið tæpt en við reddum þessu. Getum alltaf fengið einhverja íbúð á slæmum stað, við viljum bara reyna að fá íbúð sem er sæmilega nálægt skólanum svo ég sé ekki 2 tíma á dag í metro+lest+strætó. Þetta er aðeins skárra en í haust, núna erum við a.m.k. orðin nógu sleip í dönsku til að tala við væntanlega leigusala, maður heyrði það á mörgum í haust að þeir voru ekki sérlega hrifnir af því að þurfa að tala ensku við mann. Sumar auglýsingarnar á þessum leiguvefsíðum eru ansi spes. Einn vildi leigja íbúðina sína, en ekki einhverjum sem mundi búa þar full time, vildi bara leigja einhverjum sem byggi til dæmis á Jótlandi en kæmi nokkra daga í viku til Køben útaf vinnu. Annar vildi leigja íbúðina í meira en ár, en áskildi sér rétt til að henda leigjendunum út í 2-6 vikur á sumrin og láta vita af því með mánaðar fyrirvara. Svo eru náttúrulega margir sem geta alls ekki hugsað sér að fá börn í íbúðirnar sínar, algjör horror náttúrulega að leigja barnafjölskyldum!

Annars lentum við líka í leiðinlegu krappi um daginn. Vorum búin að finna mjög vænlega íbúð í Gentofte sem er rétt hjá skólanum, verðið var í lagi og konan hljómaði vingjarnleg í símanum. Vorum á leiðinni að skoða síðasta sunnudag og þá hringir hún í okkur svona 20 mínútum áður en við áttum að mæta og spyr hvar við séum. Við sögðum að við værum bara að labba niður götuna til hennar og hún sagði OK. Svo þegar hún fer að sýna okkur íbúðina er hún voðalega áhugalaus eitthvað, nennir ekkert að hlusta á okkur, sýnir ekki sameign eða kjallara og hafði engan áhuga á okkur. Áður en við förum segir hún að það sé einn annar mögulegur leigjandi sem sé að koma og hún láti okkur vita. Seinna um daginn hringir hún svo og segir að hún sé búin að selja íbúðina!!! Það stóð ekkert um að hún væri til sölu í auglýsingunni eða neitt. Þá fórum við að pæla meira í þessu og föttuðum að hún hefur auðvitað vitað áður en við komum að hún ætlaði ekkert að leigja okkur íbúðina, hringdi í okkur 20 mínútum á undan til að segja okkur að koma ekki en hefur hætt við það þegar hún heyrði að við værum rétt ókomin. Síðan vorum við skoðandi íbúðina og reynandi að segja henni eitthvað frá okkur eins og fífl, og áttum aldrei séns. Vorum grjótfúl restina af deginum og hugsuðum upp ýmis ljót dönsk orð til að kalla hana. Ég prófaði að leita að “danish swear words” núna á google og fann þessa fínu síðu. Kannski ekki góð síða til að opna t.d. í vinnunni þar sem það eru auglýsingar í kring með berbrjósta konum en þarna eru nokkrar góðar móðganir og blótsyrði, t.d. “Du er så grim at du gør blinde børn bange” og “Du ligner en ged og du lugter af tis“. Nú verð ég aldeilis tilbúinn fyrir næsta leigusala sem er fífl!

Skólinn að byrja aftur

Þá er skólinn að byrja aftur. Reyndar fór ég á tvo fyrirlestra í þessari viku, gaur frá háskóla í bandaríkjunum sem hefur verið að vinna að nýrri compiler tækni fyrir forritunarmál kom hérna og hélt tvo mjög áhugaverða fyrirlestra. Hann + tveir stúdentar hjá honum eru á bakvið nýja tækni sem er komin í Firefox 3.1 og er að hraða javascript í honum um nokkur hundruð prósent. Mjög cool. Svo byrjar alvöru skólinn á þriðjudaginn. Ég er bara í þremur áföngum þessa önn og ekki að vinna svo þetta ætti nú ekki að verða neitt of massíft. Áfangarnir sem ég tek eru:

  • Process modelling and validation – Erfiður fræðilegur kúrs sem á kannski eftir að hjálpa við masters verkefnið mitt.
  • Technology, economics, management and organisation – 10 eininga (!!!) management áfangi. Ég tók ekki einn einasta viðskiptafræði áfanga í B.Sc. náminu á íslandi þannig að ég ákvað að kannski væri kominn tími á að prófa eitthvað nýtt. Svo er Luke félagi minn líka að kenna í honum sem verður fyndið.
  • Introduction to Computer Game Prototyping – Búa til litla tölvuleiki í Python. Þetta verður örugglega snilldar áfangi sem ég ákvað að taka þó það þýddi að ég lenti í árekstri við Process modelling áfangann. Ég skelli örugglega inn einhverjum leikjum hérna þegar líður á önnina.

Það besta er samt að ég er bara 3 daga í viku í skólanum sem er ansi þægilegt. Er í fríi frá hádegi á föstudegi til hádegis á þriðjudegi og fimmtudagur er frí líka.

Annars erum við núna á fullu að leita að íbúð. Vantar 3 herbergja íbúð áður en barnið kemur, erum búin að segja okkar íbúð upp og verðum að vera komin út 1. október. Ætlum líka að reyna að komast nær skólanum, síðasta vetur tók klukkutíma að komast í skólann með hjóli+metro+lest+strætó þannig að 2 tímar á dag fóru bara í samgöngur. Erum að fara að skoða a.m.k. tvær íbúðir um helgina, vonandi kemur eitthvað útúr því.

Danmörk – Dagur 365…

Í dag er dagur 365 hér í Danmörku. Ég kom hingað 24. ágúst í fyrra og flutti inn í gáminn góða. Margt búið að gerast á síðastliðnu ári. Var fyrst einn hérna í 4 mánuði í gámnum með fólki úr öllum heimshornum. Það var að mörgu leyti mjög skemmtilegt en líka erfitt að vera í burtu frá Karen og Daníel. Búinn að prófa að vinna hjá Microsoft sem var áhugavert að öllu öðru leyti en því að það sem ég var actually að gera var frekar óspennandi. En það var fróðlegt að vinna í svona stóru fyrirtæki, kynnast fólkinu og sjá hvernig hlutirnir ganga fyrir sig þarna. Búinn að vinna sjálfstætt rannsóknarverkefni með öðrum nemanda undir leiðsögn tveggja prófessora, við sendum inn pappír til birtingar í ráðstefnu sem verður í haust, NordSec ’08, og fáum að vita á næstu dögum hvort hann verður birtur þar. Búinn að vinna í skólanum með Dönum, Bretum, Hollendingum, Litháum, Lettum og Pólverjum að allskonar spennandi og óspennandi verkefnum. Ég og Karen erum búin að koma Daníel inná leikskóla, fara til Legolands, þvælast um alla garða og legaplads í Kaupmannahöfn, læra talsvert meira í dönsku og búa til eitt stykki nýtt barn. Í heildina er ég bara mjög ánægður með þetta allt saman, þó að það sé erfitt að mörgu leyti að flytja milli landa þá er það líka áhugavert og gaman að prófa að búa í nýju umhverfi.

Í dag er líka afmælisdagurinn minn, ég er orðinn 28 ára. Eldri en Jimi Hendrix, Kurt Cobain, Jim Morrison og Janis Joplin urðu 🙂 .  Karen fann til fínan morgunverð fyrir okkur í morgun, síðan skruppum við í Fields að kaupa nokkra hluti, m.a. afmælisköku og lentum svo í brjálaðri rigningu á leiðinni til baka, komum inn öll hundblaut. Vorum svo bara þrjú saman með afmæliskaffi en fáum nokkra gesti í kvöld, Öglu og Ragga, Ebbu og Hilmar, og Hildi og Gúnda. Maður má víst samt ekki vera of lengi að í kvöld því maður verður að vakna til að sjá handboltann á morgun þar sem við munum að sjálfsögðu vinna gullið!!!

Blogg sumarfrí búið

Jæja, þá eru komnir 2 mánuðir síðan ég setti eitthvað síðast inná þessa síðu. Hef verið að spá í hvort ég ætti að loka henni þar sem ég nenni næstum aldrei að skrifa neitt, en ákvað að halda þessu áfram og reyna að skrifa aðeins oftar, svona einu sinni í viku. Mér finnst gaman að lesa þetta sjálfum eftir nokkur ár.

Hvað gerðist svo í sumarfríinu? Daníel byrjaði á leikskóla 1. júlí þannig að við slepptum plönum um að ferðast mikið í júlí, leyfðum honum frekar bara að aðlagast leikskólanum í rólegheitunum. Leikskólinn heitir Grøftekanten, við köllum hann grafarkantinn, og hann er bara hinum megin við götuna. Daníel er hæstánægður þarna þó hann geti ekkert talað við hina krakkana og er rosa duglegur að leika sér allan daginn með þeim. Ég og Karen höfum bara talað dönsku við fóstrurnar sem er ágætis æfing fyrir okkur, sérstaklega þar sem við þekkjum eiginlega enga Dani hérna! Meðan Daníel var í aðlögun vorum ég og Karen bara að njóta frísins, ég var ekkert að vinna í sumarfríinu. Vorum bara barnlaus í stórborginni, erum búin að vera mikið niðrí bæ, borða úti, fara á bíó kl. 11 um morgun o.fl. Mikið stuð.

Svo var það Íslandsferðin. Við fórum í 2 vikur til Íslands í enda júlí. Það var fínt en soldið skrýtið. Í fyrsta lagi finnst manni allt í einu íslenska landslagið soldið spes. Þessi endalausa auðn og engin tré og svona, eitthvað sem ég hef aldrei pælt í fyrr, fannst mér allt í einu voða flott þegar við komum til baka. Við bjuggum hjá Tomma og Siggu í 3 nætur eftir að við komum, svo fórum við með mömmu og pabba í brekkuskóg í nokkra daga og svo bjuggum við seinustu vikuna aftur hjá Tomma og Siggu. Okkur tókst að hitta held ég alla sem við ætluðum að hitta og skemmtum okkur bara vel. Samt fannst mér líka mjög fínt að koma aftur hingað til Danmerkur eftir ferðina 🙂

Eina leiðinlega við Íslandsferðina var að við þurftum að eyða allt of miklu af henni í stúss í sambandi við íbúðina okkar. Í júlí kom það nefnilega upp að það var myglusveppur á baðherberginu hjá okkur. Leigjendurnir okkar voru ósátt við það og sögðu upp og fluttu út. Við fengum svo iðnaðarmenn til að koma, rífa niður flísar af baðinu, taka mygluna og flísaleggja aftur. Þarna hefði þetta átt að vera búið. En nei, píparinn sem gerði þetta klúðraði þessu einhvernveginn þannig að það fór að leka bakvið trévegginn sem flísarnar voru á, og lak gegnum gólfið niður til nágranna okkar. Þannig að við vorum í sambandi við tryggingarnar, smiði og pípara meðan við vorum heima, veggurinn var rifið í sundur og klósettið, vaskurinn og baðkarið rifið út. Augljóslega gátum við ekki leigt íbúðina aftur út í þessu ástandi þannig að við fengum leigumiðlun til að gera það fyrir okkur. Ef einhvern vantar 4 herbergja íbúð í grafarvogi endilega hafið samband! Anyway, þetta tók endalausan tíma af því sem átti að vera fríið okkar sem var frekar pirrandi.

Þetta er að verða ágætt held ég. Nóg skrif fyrir næstu tvo mánuði. Eitt enn. Fyrir þá sem ekki vita þá eigum við von á öðru barni í desember. Við fórum í fyrsta sinn í sónar síðasta föstudag hérna í Danmörku og fengum nokkrar myndir, m.a. þessa glæsilegu þrívíddarsónar mynd sem er hér fyrir neðan:

Loksins að komast í frí.

Punktablogg þar sem ég nenni ekki að tengja þetta saman.

  • Skilaði inn verkefninu í Biometric systems í dag og er þar með búinn með alla áfanga. Nú á ég bara eftir að vinna á sunnudaginn og mánudaginn og þá er ég kominn í sumarfrí í tvo mánuði.
  • Luke, sá sem ég vinn með hefur það fyrir vana að skrifa á töfluna í skrifstofunni okkar ýmis kvót sem honum finnast fyndin. Núna stendur efst á töflunni okkar “Since the dawn of time man has dreamt of destroying the sun!”. Restin af töflunni er full af jöfnum, formúlum og algóriþmum. Fólk sem kemur í fyrsta sinn inná skrifstofuna okkar gæti alvarlega misskilið hvað verkefnið okkar gengur útá. (Smørrebrød í verðlaun fyrir þann sem þekkir kvótið).
  • Við fórum í fyrsta skipti til Svíþjóðar á mánudaginn, tókum lestina yfir Øresund til Malmø. Það var gaman. Besti parturinn var að í Svíþjóð eru Subway staðir sem við erum búin að sakna hérna á Danmörku. Ansi dýrt að fara til Svíþjóðar bara til að fá Subway reyndar…
  • Á forsíðunni á Urban í dag var fyrirsögnin “Nasista-barnaníðingur handtekinn fyrir að skipuleggja hryðjuverk!”. Þetta hlýtur nú bara að vera versti maður í heimi! Hvað gæti verið verra en nasista-barnaníðingur? Sem skipuleggur hryðjuverk í þokkabót!!
  • Ég hef gegnum tíðina reynt að fylgjast með helstu tækninýjungum, og nýtt mér margar þeirra s.s. veraldarvefinn og rafpóst. Núna nýlega skráði ég mig á vefsíðu sem ég hef heyrt að sé mjög vinsæl hjá ungdómnum og nefnist “Facebook” uppá ensku. Á þessari svokölluðu “Facebook” getið þið fundið mig á slóðinni http://www.facebook.com/profile.php?id=808179882 og addað mér ef þið þekkið mig og ég hef ekki nú þegar addað ykkur.
  • Venjan hjá Dönum sem eru að útskrifast með stúdentspróf er að leigja pallbíla fyrir hóp af fólki, standa svo öll á pöllunum með stúdentshúfurnar, keyra um bæinn og öskra og flauta á fólk. Bærinn var fullur af svona bílum í dag.
  • Atli frændi kom í heimsókn í dag og kom með osta og nammi frá Íslandi. Danir hafa ekki fattað hvað lakkrís með súkkulaði utanum er mikil snilld, ekkert þannig nammi fæst hérna sem er ömurlegt. Reyndar getur maður fengið 3-4 tegundir af íslensku nammi í Irma en það er eini staðurinn.

Skrýtnir danir

Furðuleg lífsreynsla í dag. Ég var með Daníel á aðallestarstöðinni og var að leyfa honum að keyra í einhverjum svona bíl sem ruggast til og frá. Bíllinn var fyrir framan þrjá svona ljósmyndaklefa þar sem maður getur tekið passamyndir af sér. Meðan ég var að bíða eftir að þetta kláraðist þá sá ég karl koma labbandi í áttina að klefunum. Hann hefur verið svona 60-og eitthvað, leit ekki út fyrir að vera róni, en var samt frekar svona skrýtinn eitthvað, labbaði t.d. allur mjög stífur, það var næstum eins og hann hefði engin liðamót í hnjánum. Anyway, hann fer inní klefann og dregur fyrir, ég er ekki að horfa á hann en heyri allt í einu hljóðið í vatni vera að renna niður. Ég lít við og sé að hann er að PISSA Í KLEFANUM, BEINT OFAN Á STÓLINN! Það var dregið fyrir svo ég sá bara fæturna á honum, aðeins í stólinn og sprænuna að lenda á stólnum! Svo kom hann út og labbaði í burtu. Ég hafði engan sérstakan áhuga á að fara að abbast eitthvað uppá gaur sem pissar í ljósmyndaklefa, var líka með Daníel og svona þannig að ég fór bara í miðasöluna þarna og lét þau vita. Veit svosem ekki hvað ég hefði átt að segja, “uhh, du skalt ikke pisse i den her pasfoto! Det er ikke toilet!”. Eða bara “Hold kjæft mand, er du sindsyg??!?”. En já, þetta var, öh, spes.

Annars kláraði ég síðasta prófið í dag, áfanga dauðans, System Integration. Gekk betur en ég vonaði þannig að ég er sáttur. Nú er bara að vinna á fullu í vinnunni og svo í næstu viku byrjar Biometric systems áfanginn sem ég verð í þrjár vikur í.

(Ég flokka þessa færslu undir Danmörk, Skóli, DTU og í nýjum flokki sem heitir Piss í ljósmyndaklefum. Ég verð mjög hissa ef sá flokkur fær einhverntímann fleiri færslur)