Category Archives: Matur

Svefntilraunir taka 1

Jæjja ég fékk þá frábæru hugmynd í dag að breyta svefntímanum hans Daníels og reyna að láta hann sofa einn langann lúr á daginn eins og vinur hans Jökull gerir. Þannig að Daníel vaknaði kl.6 (eins og venjulega) og við foreldrarnir reyndum að þrjóskast við (eins og venjulega) að taka hann uppí til okkar strax en gáfumst svo auðvitað upp(eins og venjulega) eftir 10-15 mín. Þannig að minn er síðan hálfvakandi til rúmlega 7 þegar við gefumst endanlega upp á svefninum og förum á fætur. Síðan tökum við Daníel smá kríu um 9 leytið í 15-20 mín, eða öllu heldur Daníel þar sem ég var rétt að sofna þegar hann vaknaði. Svo er hann góður til rúmlega 11 og þá gef ég honum hafragrautinn til öryggis(mjög erfitt að mata þreytt og pirrað barn) og svo þykist ég sjá á honum þreytumerki um hálf 12 þannig að ég gef honum að súpa og svo beint út í vagn. Ég hugsaði mér gott til glóðarinnar að nú myndi hann kannski sofa í rúma 2 kannski jafnvel 3 tíma!!! Neibb, ég var rétt búin að borða og búa til barnamat þegar minn vaknar, eftir aðeins klukkutíma svefn, alveg snældvitlaus! Þannig að ég bregð á það ráð að fara með hann út í góða veðrið að labba og sem betur fer datt mér í hug að taka með mér þurrmjólk í pela bara til öryggis. Daníel áfram brjálaður og ég þýt með hann út þannig að ég er ekki einu sinni búin að klæða mig almennilega í úlpuna áður en hurðin skellist á eftir mér. Látunum linnir ekki hjá Daníel sama hvað ég rugga og hugga og gef snuð, ekki fyrr en ég gef honum pelann. Það var eins og barnið hafði aldrei fengið að borða áður og á stuttum tíma runnu 170 ml ljúflega niður í mallann á stráknum. Við skulum ekki gleyma að fyrir tæpum tveim tímum fékk hann risaskammt af hafragraut sem er lengi að meltast og mjög seðjandi + mjólkin frá mér og svo var hann sofandi. Þessi strákur er greinilega sonur pabba síns; botnlaus! Jæja, þá hætti hann að gráta loksins en að fara sofa? Think again! Þannig að ég held áfram að ganga og ganga og ganga af því að veðrið var svona gott og svo loksins um tvö sofnar hann og er búinn að vera sofandi síðan (klukkutími). Ég veit ekki hvort ég ætti að prófa þetta aftur á morgun…. sé hvað hann sefur lengi núna.

Annars er fátt skemmtilegra hjá Daníel núna en að grípa í tásurnar og velta sér heilann hring, auðvitað í tveim lotum. Fengum svo Völu og Jökul í heimsókn í gær. Við mæðurnar lögðum strákana saman á leikteppið eftir að þeir voru vaknaðir og það er stysst frá því að segja að Daníel átti fótum sínum fjör að launa ef hann bara gæti labbað! Jökull var bara í því að toga og pota í Daníel þannig að það var varla óhætt að skilja þá saman eftir meðan að við mæðurnar hömuðumst í jólakortagerð. Ekki bætti úr að Daníel er dáldið viðkvæmur og grátgjarn þannig að um leið og hann fann að það var verið að brjóta eitthvað á sinn hlut þá var skeifan fljót að koma og ég auðvitað þurfti að hlaupa til til að hugga. Jæjja ég ætla að nýta þennan tíma meðan að strákurinn er sofandi og reyna að gera eitthvað hérna heima…. heyrðu, hann er VAKNAÐUR!

5 mánaða skoðun

Daníel var 5 mánaða á sunnudaginn síðasta og fórum við þess vegna í 5 mánaðaskoðun í gær þar sem hann var vigtaður, mældur og fékk sprautu! Aftur er Daníel ekki nógu duglegur að þyngjast eða tæp 6,8 kg þrátt fyrir allann þennan graut. Hann er hins vegar vel langur eða 67,5 cm minnir mig. Hjúkrunarfræðingurinn (þessi sama og hefur verið að fylgja okkur eftir í þessum vigtununum öllum) sagðist ekkert vita hvert allur þessi grautur væri að fara en sagði samt að þetta væri ekkert til að hafa áhyggjur af af því að þetta væri flottur og hraustur strákur. Hún spurði mig út í vaxtarlag föðursins og ég sagði auðvitað eins og er að hann er mjög langur og grannur og fitnar aldrei sama hvað hann lætur oní sig og hún sagði að þá hefði Daníel sennilega bara erft þetta frá pabba sínum. En engu að síður þá ákváðum við að bæta inn annari grautarmáltíð inní daginn hjá honum og að þessu sinni hafragraut til að auka fjölbreytnina. Að lokum fékk svo litli kallinn sprautu og stóð sig eins og hetja!

Eftir skoðunina fórum við svo að versla smá mat handa kallinum þar sem ég keypti lífrænann ungbarnahafragraut, þriggjakornagraut og svo nokkarar Hipp krukkur með kjúlla, hrísgrjónum og grænmeti. Máltíðirnr hjá stráknum eru þá svona að hann fær í hádeginu hafragraut með stöppuðum banana eða rifnum eplum, í eftirmiðdaginn fær hann grænmetis eða ávaxtamauk og svo á kvöldin fær hann hirsgraut með maltextrakt. Þess á milli fær hann bara að súpa hjá mér. Svo reynir maður að hafa smá fjölbreytni í þessu til að hann fái nú að kynnast nýjum hlutum og verði ekki leiður á þessu. Ég er líka að próf að gefa honum soðið volgt vatn í pelann blandaðann með smá hreinum safa og hann drekkur það með bestu list en um leið og það er BARA vatn þá vill hann ekki sjá það. Gengur ekkert með þessa stútkönnu, ætla að bíða með það.

Við erum svo að fara að fá tripp-trapp stólinn hjá Tomma og Önnu Maríu um helgina og þá getur Daníel farið að sitja með okkur til borðs í skamman tíma í einu. Hann verður auðvitað vel skorðaður þar sem hann er ekki farinn að sitja ennþá. Hann er sko ekki lengur sáttu að sitja bara á gólfinu meðan að við erum að borða og búinn að fatta það að það er meira spennandi hlutir að gerast uppá borðinu!

Engar meiri næturgjafir

Nú er komið að því! Við erum byrjuð að venja Daníel á að drekka ekki á nóttunni sem þýðir að innan skamms munum við fá að sofa samfleytt alla nóttina í fyrsta sinn í meira en 4 mánuði! Litli kallinn er farinn að borða góðan skammt af graut á hverju kvöldi þannig að hann á alveg að endast nóttina án þess að fá meira. Fyrir þrem nóttum prófuðum við þetta fyrst, þá vaknaði hann þrisvar og þá fékk hann bara vatn í pela og fór aftur að sofa. Í fyrrinótt vaknaði hann tvisvar eða þrisvar og fékk ekki neitt, bara snuð. Og svo núna í nótt vaknaði hann í fyrsta skipti kl. 5, fékk þá smá vatn og fór aftur að sofa. Ég hef það á tilfinningunni að nóttin í nótt verði fyrirheitna nóttin. Þegar ég tala um að sofa alla nóttina þá meina ég að sjálfsögðu bara til kl. 7, en það er feykinóg!

Svo verður Daníel vigtaður á morgun og þá kemur í ljós hvort allur þessi grautur hefur hjálpað honum að þyngjast. Í síðustu vigtun var hann 6,36 kg, ég giska á að núna sé hann orðinn 6,9 kg. Kemur í ljós á morgun. Fyndið hvað tíminn líður hratt og litli strákurinn okkar er farinn að borða mat og hættur að drekka á nóttunni… Átti ekki von á að hann yrði svona stór svona fljótt!

p.s.
Daníel fékk lítið tuskudýr gefið frá langömmu sinni um helgina, litla kind. Hún hefur verið skírð Kindin Einar.

Kommentakerfi

Jæjja, komið nýtt kommentakerfi fyrir ykkur litlu rúsínur sem eruð að fylgjast með okkur. Sá þetta á barnalandi en mér var nú samt búið að detta þetta í hug þó nokkru áður og fékk svo Einar til að redda þessu 🙂 .

Annars er Daníel ekkert að fýla eldamennskuna mína en er alltaf til í Gerber-krukku… snemma beygist krókurinn!

LOKSINS! LOKSINS!

Jæjja þá er síðan loksins komin aftur í gang eftir langt “frí” skulum við kalla það. Nei, það sem gerðist er að tölvan hjá Hrefnu og Agli, þar sem síðan er geymd, hrundi fyrir nokkru og þar sem við erum ekki með borðtölvu sem er sítengd við netið þá var ekkert annað að gera en að hafa bara síðuna í pásu. En svo núna um daginn þá fór Einar (snilldar eiginmaðurinn minn) og færði síðuna eitthvert og nú er allt í gúddí.

En það er fullt búið að gerast á þessum tíma og Daníel er alltaf að stækka. Reyndar er hann ekki alveg að stækka nóg og er aðeins búinn að þyngjast um 460gr á síðustu 6 vikum. Ég fór með hann semsagt í vigtun uppá heilsugæsluna í gær og þá vó hann 6,360 kg sem er nú ekki mikið fyrir 4 mánaða gutta og hann er alveg búinn að taka sveig á vaxtarkúrfunni. Ég er nú reyndar búin að vera að gefa honum pínu ponsu graut í hádeginu og stundum á kvöldin og stundum smá perumauk en nú sagði hjúkkan að hann þyrfti bara að fá meira! Bara gjöra svo vel að gefa barninu að borða og hana nú! Ég þurfti sko ekki að láta segja mér þetta tvisvar og þaut beinustu leið út í búð og keypti nokkrar gerber krukkur og epli, perur og banana. Planið er semsagt að gefa honum ávaxta- eða grænmetismauk í hádeginu og svo hrísmjölsgraut á kvöldin og svo fær hann auðvitað bara mjólkina sína eins og venjulega. Mér finnst þetta svo spennandi að ég verð að hemja mig í gjöfunum. Mér finnst svo spennandi að leyfa honum að smakka mismunandi bragð og þykkleika að ég er alveg að missa mig hérna en það er talað um að prófa alltaf bara eina tegund í einu í nokkra daga. Hann er semsagt búinn að prófa peru- og gulrótarmauk og svo núna í hádeginu kartöflustöppu. Hann var voða hrifinn af perumaukinu (enda dísætt), fannst gulrótarmaukið ekkert rosalega spennó en lét sig hafa það en kartöflumaukið fannst honum sko vont! Ojjjjj! Ég sem hafði svo mikið fyrir þessu að sjóða þetta og stappa og blanda pínu matarolíu út í og svo meira að segja blandaði ég smá brjóstamjólk en af grettunum að dæma á honum Daníel þá fór ekkert milli mála að þetta var vont! Jæjja þannig að kartöflustappan bíður bara betri tíma. Annars skil ég hann ósköp vel, ekki fannst mér þessi kartöflustappa góð og kýs perumaukið framyfir hana anytime. En við verðum bara að sjá hvort að hann þyngist ekki eitthvað af þessu enda hlýtur hann að gera það því hann er eins og botnlaus tunna. Það er bara ég sem er svo mikill hænuhaus að þora ekki að gefa honum meira.

Svo loksins dröttuðumst við foreldrarnir að kaupa almennilegt leikteppi handa stráknum og hann er svooooooo hrifinn af því og unir sér þar sæll og glaður. Það sem er mest spennandi núna er spegill sem er festur í einu horninu og hann Daníel er svo hrifinn af stráknum sem er í speglinum að hann horfir á hann alveg fram eftir öllu og þar til hann sofnar! Svo er þessi spegill svo spennandi að Daníel er meira að segja tilbúinn að læra að snúa sér af bakinu yfir á magann til að komast nær. Þannig að nú er þetta aðalsportið fram og til baka, fram og til baka.

Varðandi myndir þá koma þær vonandi inn fljótlega enda höfum við ekkert hætt að taka þær þó svo að síðan hafi verið niðri. Málið er það að eftir að við fluttum þá höfum við ekki komið ADSL-inu upp. En ég lofa að setja þetta í algjöran forgang hjá mér og þær verða örugglega komnar inn fyrir helgi.

Come on, vogue!

Come on, vogue ! Let your body move to the music!

Þetta er alveg í uppáhaldi hjá Daníeli þessa dagana eða ekki lagið sko heldur dansinn sem fylgir því. Hann er sko alveg með handahreyfingarnar á hreinu og er duglegur að sýna okkur (jafnt dag sem nótt).

Þar sem að strákurinn er að taka vaxtarkipp núna þá drekkur hann rosalega mikið þessa dagana eða á ca. 1-1 og hálfs tíma fresti og þar sem Einar er því miður ekki gæddur þeim kosti að hafa mjólkandi brjóst (já, ég er búin að biðja til guðs) þá er nánast ómögulegt fyrir mig að fara út fyrir hússins dyr.

Annars hafa tvær nýjar íþróttagreinar verið kynntar til sögunnar í vikunni af honum Daníel; annars vegar er um að ræða hið skemmtilega “brjóstamaraþon”, sem gengur út á að reyna á þolinmæði móður sinnar og sjá hvað maður kemst upp með að hanga lengi á brjóstinu, og hins vegar “lang-kúkur”, sem gengur út á að spýta nr.2 eins langt frá rásmarkinu og mögulegt er meðan á bleyjuskiptingum stendur. Ég er ekkert sérstaklega hrifin af hvorugri íþróttinn enda ekki þekkt fyrir að vera mikil íþróttamanneskja.

Í gær fórum við í heimsókn til Völu og Hjalta til að kíkja á Jökul. Hann Jökull er sko alveg pínulítill miðað við risann hann Daníel (bara 10 dagar á milli) en munurinn leynist ekki í lengdinni heldur í holdarfari. Daníel er nefnilega algjör bolla miðað við vin sinn hann Jökul og hef ég því verið mikið að spá í að skipta yfir og fara að framleiða léttmjólk handa drengnum. Annars var þetta dáldið furðuleg heimsókn þar sem við Vala sátum bara í sófanum og vorum eiginlega allann tímann að gefa strákunum okkar. Síðan þakkaði Daníel fyrir sig með því að æla smá í sófann en Vala og Hjalti tóku það nú ekki nærri sér og sögðu að það hefði margt verra farið í þennan sófa síðan Jökull kom til sögunnar 😉 .

Eftir heimsóknina í Vegghamrana fórum við til pabba þar sem Daníel spreytti sig í “lang-kúk” og tókst að ná góðum 50-60 cm sem náði vel út fyrir allar varnir sem ég var búin að setja upp. Pabba mínum fannst þetta mjög skondið meðan að við foreldrarnir vorum ekki eins hrifnir meðan við vorum að þrífa teppi og fleira. Meðan á þrifunum stóð þá toppaði litli kallinn þetta og bætti við smá Golden-shower tilþrifum við. Daníel Máni fær því fullt hús stiga fyrir gærdaginn og það er spennandi að fylgjast með hvað hann gerir næst!

3 vikna

Daníel Máni er alltaf að stækka og er nú orðinn rúmlega þriggja vikna gamall. Hann er farinn að drekka allsvakalega mikið, svona eins og hálft mjólkurbú flóamanna á hverjum degi og vill helst vera á brjóstinu allan daginn. Hann reyndar ælir soldið inná milli en eins og alvöru víkingur lætur hann það ekki á sig fá og bætir það bara upp með meiri mjólk. Hann er hættur að pissa jafnoft á skiptiborðinu en til að halda uppi fjörinu þá er hann farinn að kúka stundum á það í staðinn. Til að þrífa upp kúk, piss, ælu og brjóstamjólk þá notum við svona u.þ.b. 500 taubleyjur á dag og þvottahúsið okkar er óneitanlega farið að minna á þvottaefnisauglýsinguna þar sem er mörg hundruð metra löng þvottasnúra með engu nema skjannahvítum bleyjum.

Í öðrum fréttum er það helst að Daníel Máni sagði fyrstu orðin sín í gær. Það var nú meira bara svona hjal en ég gat nú samt greint nokkuð vel hvað hann var að reyna að segja. Það sem hann sagði var “Pabbi, kauptu handa mér fjarstýrðan bíl og sýndu mér hvernig á að nota hann. Takk”. Því miður var ég einn vitni að þessum merkisatburði og Karen virðist vera eitthvað vantrúuð á þetta þannig að það verða víst ekki keyptir neinir fjarstýrðir bílar strax. En það kemur að því!!

Kúkur og piss!

“Mommy, I´ve got a present for you. I´ll give you a hint: it´s in my diaper and it´s not a toaster!”

Kúkableyja í verðlaun fyrir þann sem þekkir kvótið. Er núna búinn að skipta á u.þ.b. 5000 bleyjum þannig að er orðinn nokkuð sleipur í þessu. Allt gengur annars vel, fullt af fólki búið að koma í heimsókn, öllum líst mjög vel á strákinn. A.m.k. 5 manns búnir að segja að hann sé mjög “mannalegur”, hvað sem það nú þýðir. Eru ekki öll börn mannaleg? Ég efast a.m.k. um að fólk sé mikið að líkja þeim við aðrar dýrategundir (“Til hamingju með strákinn, hann er svakalega líkur hesti!”).

En aftur að kúkamálunum. Drengurinn er engan veginn ánægður þegar á að skipta á honum og öskrar úr sér lungun en jafnar sig um leið og hann er kominn í nýja bleyju. Hann er líka búinn að koma sér upp mjög öflugri leið við að pissa. Hún gengur útá að kúka fyrst, svo þegar hann er kominn á skiptiborðið og úr bleyjunni þá lætur hann rigna gulu yfir foreldra sína, skiptiborðið og allt annað í tveggja metra radíus. Sérstaklega er hann góður í að gera þetta rétt eftir að maður snýr sér frá þannig að hann nái sem bestri pissdreifingu áður en maður tekur eftir þessu og getur stokkið á hann með aðra bleyju. En hann er duglegur að drekka, og yfirleitt voða vær þannig að við erum bara mjög ánægð 🙂 .

Endurskoðun

Fórum í endurskoðunina í dag og lilti guttinn stóðst öll próf með prýði! Hann var meira að segja bara rétt undir fæðingarþyngdinni sinni (80 gr.)þrátt fyrir að hafa lent í basli í byrjun með brjóstagjöfina. En hann er farinn að taka brjóstið rétt núna þannig að öll þessi þolinmæðisvinna er að borga sig og það er alveg yndisleg tilfinning 🙂 .

Jæjja það er verið að kalla á mig 😉 .