Category Archives: Hreyfing

Duglegur Daníel!

Fór með Daníel til læknis útaf útbrotum sem hann var með á kroppnum og læknirinn sagði að þetta væri bara exem eða m.ö.o. viðkvæm húð. Fékk stera-krem fyrir kroppinn og svo annað krem fyrir bossann á honum sem reyndist ekki vera til neinstaðar á landinu nema á Raufarhöfn og Höfn! Hann er strax orðinn betri og um leið miklu hressari og skapbetri 😉

Þessa dagana gerum við ekki annað en að eltast við litla gaurinn útum alla íbúð þar sem hann er allt í einu farinn að “þora” að flakka um einn. Fyrst þegar við settum hann á góflið að skríða þá vildi hann bara koma til okkar og oft fylgdi mikið táraflóð með En um leið og Daníel fór að skríða svona mikið eignuðumst við nýja skúringavél! Þannig er að hann slefar svo svakalega og svo þurkar hann það upp og gólfið um leið með maganum þegar hann skríður. Það er best að fara að taka sig á í þrifunum því fötin hans hafa því miður borið merki um slæma húsmóðurshæfileika mína.

Daníel er líka búinn að læra að toga sig upp við stól, borð, sófann og í rauninni hvað sem er. Það er líka mjög gaman að standa núna og dúa og dilla rassinum og svo auðvitað reynir hann að fikra sig meðfram því sem hann stendur við en með misjöfnum árangri. En Daníel er duglegur, þegar hann dettur þá reynir hann bara um leið aftur! 🙂 En um leið og þessi aukni hreyfanleiki kom til sögunnar þá hafa slysagildrurnar aukist um 300% hérna á heimilinu. Til þessa hefur hann næstum því togað heila þvottagrind ofan á sig og rafmagns gítarinn, var á góðri leið með að stinga puttunum í innstungu og hefur hrunið einu sinni fram úr rúminu. Þannig að helst í gær ættum við að vera búin að kaupa hlífar á öll horn og öryggislok á allar innstungur og fjöltengi og það verður gert strax á morgun. Annars erum við búin að vera dádlið upptekin í fasteignaleit undanfarið og það gæti verið að við séum komin með eina í sigtið en meira um það seinna 8).

Byrjaður hjá dagmömmu

Við Daníel byrjuðum á mánudaginn hjá Ingu dagmömmu. Við byrjuðum bara rólega og erum bara búin að vera ca. 2 tíma á dag og ég hef skroppið aðeins frá til að leyfa þeim að vera einum. Í dag fór ég svo frá í tæpa 2 tíma og Daníel var bara alsæll allann tímann, ég er greinilega ekki eins ómissandi eins og ég vil halda! Þannig að á morgun er planið að fara hálf 9 og vera fram á hádegi. Svo vonandi verðu hann farinn að geta verið allann daginn í næstu viku kannski og þá ætla ég að fara í atvinnuleit.

Annars vorum við Sandra í dag að láta okkur dreyma um að geta farið út í göngutúr með vagninnn en það er ekki glæta meðan að snjóruðningstækni Reykjavíkurborgar er ekki betri en þetta. Hérna kemur dæmi: maður sér vel rudda gangsétt og fylgir henni en síðan af einhverjum ástæðum hefur snjóruðningsmaðurinn ákveðið að hætta að skafa snjóinn 3-4 metra og byrja svo aftur. Annað dæmi er að þegar komið er að götu eða gatnamótum þá er búið að ryðja snjónum af götunni uppá gangstéttina þannig að maður þarf að klífa yfir skaflana til að komast yfir. Getur einhver ímyndað sér hvernig það er að reyna að reyna að komast leiðar sinnar með barnavagn í þessari færð eða hvað þá með gamla fólkið??? Sem betur fer var Sandra með mér og saman HÉLDUM VIÐ Á VAGNINUM yfir verstu kaflana. Fáránlegt, verð fegin þegar snjórinn verður farinn.

Það eru endalausar framfarir hjá Daníel. Hann er farinn að sitja í lengri tíma að leika sér óstuddur og hann getur staðið með ef hann nær taki á einhverju. Svo er Daníel byrjaður að borða brauð með smjöri og kæfu í litlum bitum og fisk með kartöflum og gulrótum og ofan á er hann byrjaður að borða kjúkling og lamb. Næsta skref í matarmálunum er að prófa þorsk og brún hrísgrjón.

Stofufangelsi

Daníel í leikgrindinniDaníel er búinn að sýna það og sanna að það þarf ekki að kunna að skríða til að komast frá A til B. Ég er orðin frekar þreytt á því að eltast við litla gaurinn út um alla stofu og sjá hann vera að reka sig í allt sem verður á vegi hans þannig að við ákváðum að taka fram leikgrindina sem er búin að vera að bíða þolinmóð útí geymslu. Daníel var nú ekkert rosalega ánægður með litla litríka fangelsið sitt í fyrstu en er núna tvímælalaust búinn að uppgötva kostina við að leikföngin sleppi aldrei frá honum. Ég er rosalega ánægð með þetta þar sem að ég slepp við að vera alltaf að hlaupa til og svo er þetta rosalega flott leikgrind sem litlu frændur mínir áttu.

Nú er Daníel búinn að komast uppá lagið með að sitja eða svo gott sem. Hann er nú frekar valtur ennþá greyið en hann er þó að reyna og er hættur að spenna sig svona svakalega. Það kemur þó oft fyrir að hann reyni að lokum að spenna sig því það er fátt eins skemmtilegt og að standa í lappirnar enda er hann orðinn nokkuð stöðugur.

Tennurnar halda áfram að spretta og þessar tvær vinkonur sem eru komnar í neðri góminn eru rúmlega hálfnaðar á leiðinni upp. En það er eins og hún Steina vinkona mín sagði að nú styttist í að Daníel færi að bíta mig í brjóstið og það stóðst. Hann tók fyrst uppá þessu í gær og síðan þá er hann búinn að bíta mig fjórum sinnum!!! Þetta er svakalega sárt!!! Ég auðvitað rykkist til og kveina og þá verður aumingja Daníel hræddur og fer að gráta og er síðan nánast ófáanlegur til að halda áfram að drekka. Ég fæ smá samviskubit af því að hræða hann svona og ég verð að finna betri leið til að stöðva þetta af því að svona getur þetta ekki gengið. Þetta er strax komið á það stig að mig er farið að kvíða fyrir því að gefa honum og er alltaf tilbúin að kippa mér frá. Vonandi finnum við lausn á þessu EINS FLJÓTT OG MÖGULEGT ER! Annars erum við bara að undirbúa okkur svona smám saman undir að fara til dagmömmunnar og erum að breyta svefnrútínunni eina ferðina enn (ég þoli ekki að breyta rútínum). Ég er líka að prófa að gefa Daníel smá smakk af brauði bleyttu í mjólk en hann er ekki alveg til í þetta og kúgast. Það þýðir ekkert annað en að halda áfram að reyna af því að hann þarf að fara að venjast fleiri hlutum en silkimjúku mauki.

Jæja, tími til kominn að fara að sofa þar sem við erum ennþá mjög árrisul hérna á þessu heimili þökk sé Daníel en það fer brátt að breytast þar sem við erum búin að ákveða að reyna að vera búin að hætta morgungjöfunum áður en ég byrja að vinna. Góða nótt.

Dagmamma og bílstóll

Fékk þvílíkt sjokk í fyrradag þegar ein dagmamma hringdi, sem ég hafði haft samband við fyrir nokkrum mánuðum, og tilkynnti mér að það væri að losna pláss hjá henni núna um miðjan janúar! Ég sem var búin að plana að vera heima allavegan út febrúar 🙁 . Fyrst ætlðum við bara að segja nei en svo hugsuðum við okkur um og það er svo erfitt að fá pláss hjá dagmömmum nú til dags að við ákváðum að kíkja allavegana. Svo fórum við í gær og það tók á móti okkur þessi indæla eldri kona, hún Ingibjörg. Þetta var allt mjög snyrtilegt og Ingibjörg er mjög ákveðin og vill hafa reglu á hlutunum. Okkur leist bara mjög vel á þetta og Daníel fékk að sitja í kjöltunni á henni allann tímann meðan að við vorum að spjalla og líkaði bara mjög vel. Þannig að við erum búin að ákveða að Daníel byrjar í Dagvistun í nokkra tíma á dag um miðjan janúar til að venjast þessu (og ég líka) og svo verður hann allann daginn frá og með febrúar og þá byrja ég að vinna ef ég verð komin með vinnu þá 🙂 . Þetta er þvílík breyting að ég má vart hugsa til þess að sjá ekki Daníel í svona langann tíma… það munar minnstu að ég sakni hans eftir nóttina!

Annað nýtt hjá okkur er að við erum búin að fjárfesta í nýjum barnabílstól þar sem hinn var löngu orðinn alltof lítill. Skil ekki hvernig þessi gamli stóll á að endast fyrir börn uppí 10 kg þar sem Daníel þurfti að sitja pínu fram með axlirnar þegar hann var vel klæddur! Allavegana þá er þessi nýji stóll frá Britax og hann er fyrir 9-18 kg en við erum að svindla smá enda er ég búin að ákveða að fara meira eftir eigin innsæi en þessum endalausu stöðlum. Þegar ég held að hann sé tilbúinn þá er hann tilbúinn. Við erum ekki búin að prófa stólinn ennþá en hann snýr í aksturstefnu þannig að það verður auðveldara að fylgjast með stráknum og ég er viss um að hann mun kunna að meta útsýnið.
Annars er allt gott að frétta og Daníel hringsnýst hérna á gólfinu fyrir framan mig í þessum endalausu tilraunum til að komast af stað. Hann er enn ekki farinn að sitja sjálfur en þó orðinn sáttari við að sitja bara almennt en nú er hann líka farinn að standa í lappirnar án þess að kikna!

Ammælisbörn

Við Daníel vorum ammælisbörn á þriðjudaginn síðasta og hann var hálfs árs og ég fimmtíu sinnum eldri!!! Takk fyrir allar kveðjurnar bæði hérna og í meili og pósti (Sandra). Fyndið hvað maður er farinn að gera lítið á ammælinu sínu, hélt eiginlega meira uppá það að Daníel var orðinn hálfsárs.

Tennurnar hjá Daníel eru farnar að sjást meira og hann hefur mikla unun af því að naga kæli-leikföngin sín. Við erum eiginlega líka hætt að leyfa honum að naga puttana á okkur og hnúana því …ÁÁÁ… það er orðið vont! Við fórum í hálfsársskoðunina líka á þriðjudaginn þar sem Daníel var vigtaður, skoðaður og fékk að lokum sprautu við heilahimnubólgu. Það vildi svo til að það var ungbarnasérfræðingur á heilsugæslustöðinni sem skoðaði hann og ég spurði hvort það gæti verið eitthvað að Daníel af því að hann vill alls ekki vera í sitjandi stellingu. Hann vill alltaf reisa sig við með því að spyrna og fetta sig og vill bara standa. Hann sagði að hann væri bara með svona svakalegt viðbragð og að þetta myndi eldast af honum og ekki hafa áhyggjuar af þessu. Hann gerði smá athugasemd við naflann á stráknum (sem er svakalega útstæður) og talaði eitthvað um gat sem væri að gróa… kíkja á þetta í fyrsta lagi þegar hann væri orðinn eins árs. Veit ekki meir. Svo var það þyngdin sem er 7,15 kg sem er bara nokkuð gott miðað við þennan strák. Það þýðir að hann hefur þyngst um tæp 200 gr á tæpum 2 vikum. Ég er bara löngu búin að sætta mig við að þetta er bara langur og mjór strákur eins og annar fjölskyldurmeðlimur sem þið kannist kannski við. Núna er ég búin að bæta inn smá kjúlla inná matseðilinn og líkar Daníel þetta bara mjög vel.

Úff, komin löng færsla.

Að lokum ætla ég að koma með topp 5 hluti sem geta verið frekar pirrandi en samt mjög fyndnir eftirá.

  1. Þegar maður er nýbúinn að skipta á og klæða Daníel til að fara út að sofa þegar maður allt í einu…. finnur kúkalykt!
  2. Þegar maður er nýbúinn að setja Daníel út í vagn og er í miðri hárlitun þegar… Daníel fer að gráta og maður þarf að hlaupa út!
  3. Þegar maður er nýbúinn að skipta um á Daníel og hann kúkar þannig að maður þarf að skipta aftur og svo þegar hann er tilbúinn og kominn í allt þá… ælir hann yfir allt!
  4. Þegar Daníel er orðinn þreyttur og pirraður og maður er að drífa sig í að hátta hann og svo þegar hann er kominn í vagninn eða rúmið þá… er hann glaðvakandi og alls ekki á leið að fara að sofa!
  5. Þegar maður er að gefa Daníel graut og hann annaðhvort puðrar eða hnerrar heilli munnfylli yfir mann!!!

Alltaf eitthvað nýtt

Þroskanum hjá Daníel fleygir fram og hann er alltaf að taka uppá einhverju nýja. Ég prófaði fyrir einhverjum 2-3 vikum að gefa honum smá safa í stútkönnu en hann var engann veginn að fatta það. Í gær gerði ég svo aðra tilraun og gaf honum fyrst í stútkönnu sem lekur úr og hjálpaði honum aðeins og allt gekk vel. Svo seinna um daginn ákvað ég að gefa honum í stútkönnu sem lekur ekki úr og hugsaði með mér að hann gæti þá bara leikið sér með þetta en hann fattaði þetta sko strax og stakk beint uppí sig og drakk pínu í einu. Það var samt mesta sportið að leika sér með könnuna og handfjatla hana og svo fá sér sopa öðru hvoru.

Daníel er líka orðinn handaóður og borðbúnaði, dúkum og öðru lauslegu er ekki lengur óhætt þegar hann er nærri. Hann er líka farinn að sitja í tripp-trapp stólnum sínum til borðs en líkar það svona misvel. Annað sem hann er líka að gera er að fylgajst náið með öllu því sem ég legg mér til munns og í fyrradag tók hann kók-flöskuna mína í gíslingu og var alveg frá ef ég ætlaði að taka hana af honum 😉 . Minnir þetta ykkur á einhvern kók fíkil sem þið kannist við? Vísbending: Hár, grannur og er pabbi Daníels!

Annars erum við að fara í sund með Völu og Hjalta á eftir. Okkur fannst það vel til fundið að fara saman þar sem það er örugglega hvergi jafngóð aðstaða til að leggja frá sér ungbörn eins og í ungbarnasundinu eins og við erum vön. Það verður gaman að prófa að fara í alvöru laug með strákana.

Klukk!

Var að sjá að við vorum klukkuð af Friðrk og Unni þannig að hérna koma 5 atriði um Daníel:

  1. Daníel er mjög stundvís strákur. Fæddist daginn sem hann var settur og vaknar alltaf rétt yfir 6 til að fá morgunmjólkina sína.
  2. Hann var og er mjög líkur pabba sínum á fleiri en einn hátt.
  3. Daníel finnst ekkert skemmtilegra þessa dagana en að rúlla sér á teppinu og reyna að skríða.
  4. Daníel er algjört matargat og borðar flest allt sem honum er boðið, líka þótt það sé ekki matur!
  5. Daníel er mikill húmoristi og er ekkert vandlátur á hvað honum finnst fyndið. Hann getur samt verið á stundum algjör drama-drotting líka.

Við klukkum hér með Jökul og Svein Skúla!

Nú gerast hlutirnir hratt!

Daníel sem er búinn að ná núna fullum tökum á rúllutækninni, finnst ekkert skemmtilegra núna en að liggja á maganum. Ef við setum hann á bakið þá er hann búinn að velta sér yfir á augabragði. Þessi skyndilega rúllutækni kom okkur í opna skjöldu og þá sérstaklega Einari. Þannig var að Einar fór inní eldhús að búa til graut handa Daníel sem lá á teppi inná stofugólfi. Það er hægt að sjá beint innan úr eldhúsinu þar sem Daníel liggur alltaf í stofunni en þegar Einar er síðan að koma inní stofu þá er DANÍEL BARA HORFINN! En hann fór nú ekki langt, náði bara að rúlla sér nokkrum sinnum og útaf teppinu og þar með úr augnsýn! Ég held að hann hafi ætlað að kíkja í heimsókn til mín í skólann 🙂 . Ætli það fari ekki að fara bráðum að koma tími á leikgrindina?

Um leið og Daníel varð svona spenntur fyrir því að rúlla sér þá kom annar áhugi samfara því og það er að skríða!!! Hann er nú ekki byrjaður að skríða en hann er byrjaður að reyna að lyfta bossanum og hreyfa lappirnar með, þó með litlum árangri enn sem komið er. Ég veit ekki hvað eg er búin að reyna oft að lyfta upp bossanum á honum og kenna honum svona handa og fótatökin en það hefur alltaf komið fyrir ekkert. Það er greinilegt að börnin láta ekkert ýta á eftir sér í svona efnum heldur fara bara á eigin hraða, í þessu tilfelli ljóshraða 😉 . Ég held ég standist ekki mátið og ætli að fara að kaupa handa honum einhverskonar skriðsokkabuxur sem eru með eitthvað stammt efni á hnjánum.

Ég er að fara í próf í dag (jákvæðir straumar milli kl 14-17 eru vel þegnir) og Einar ætlar að fara í millitíðinni með Daníel í vigtun og svo í ungbarnasundið sem ég því miður missi af í þetta skipti. Ég vona að Daníel hafi þyngst eitthvað af viti núna því að hann borðar eins og hestur! Svo er hann líka búinn að taka sig á í mjólkurdrykkjunni, held að hann hafi bara verið hálflystarlaus útaf kvefinu og hóstanum.

Það er eitt búið að vera að angra mig dáldið og það er hvað það eru margir búinir að koma inná þessa síðu og ég veit ekkert hverjir það eru. Þetta fer að nálgast 3000 hitt og ég veit auðvitað að nánasta fjölskylda og vinir kíkja hingað en hvað með allt hitt? Og enginn skrifar í gestabókina eða kommentar eða neitt. Mig er farið að gruna að fólk útí bæ sem kannski rétt þekkir okkur Einar sé að lesa hérna um heimilislífið hjá okkur og ég veit ekki alveg hvað mér finnst um það. Kannski maður ætti að setja inn password… Einhverjar skoðanir á því?

Svefntilraunir taka 1

Jæjja ég fékk þá frábæru hugmynd í dag að breyta svefntímanum hans Daníels og reyna að láta hann sofa einn langann lúr á daginn eins og vinur hans Jökull gerir. Þannig að Daníel vaknaði kl.6 (eins og venjulega) og við foreldrarnir reyndum að þrjóskast við (eins og venjulega) að taka hann uppí til okkar strax en gáfumst svo auðvitað upp(eins og venjulega) eftir 10-15 mín. Þannig að minn er síðan hálfvakandi til rúmlega 7 þegar við gefumst endanlega upp á svefninum og förum á fætur. Síðan tökum við Daníel smá kríu um 9 leytið í 15-20 mín, eða öllu heldur Daníel þar sem ég var rétt að sofna þegar hann vaknaði. Svo er hann góður til rúmlega 11 og þá gef ég honum hafragrautinn til öryggis(mjög erfitt að mata þreytt og pirrað barn) og svo þykist ég sjá á honum þreytumerki um hálf 12 þannig að ég gef honum að súpa og svo beint út í vagn. Ég hugsaði mér gott til glóðarinnar að nú myndi hann kannski sofa í rúma 2 kannski jafnvel 3 tíma!!! Neibb, ég var rétt búin að borða og búa til barnamat þegar minn vaknar, eftir aðeins klukkutíma svefn, alveg snældvitlaus! Þannig að ég bregð á það ráð að fara með hann út í góða veðrið að labba og sem betur fer datt mér í hug að taka með mér þurrmjólk í pela bara til öryggis. Daníel áfram brjálaður og ég þýt með hann út þannig að ég er ekki einu sinni búin að klæða mig almennilega í úlpuna áður en hurðin skellist á eftir mér. Látunum linnir ekki hjá Daníel sama hvað ég rugga og hugga og gef snuð, ekki fyrr en ég gef honum pelann. Það var eins og barnið hafði aldrei fengið að borða áður og á stuttum tíma runnu 170 ml ljúflega niður í mallann á stráknum. Við skulum ekki gleyma að fyrir tæpum tveim tímum fékk hann risaskammt af hafragraut sem er lengi að meltast og mjög seðjandi + mjólkin frá mér og svo var hann sofandi. Þessi strákur er greinilega sonur pabba síns; botnlaus! Jæja, þá hætti hann að gráta loksins en að fara sofa? Think again! Þannig að ég held áfram að ganga og ganga og ganga af því að veðrið var svona gott og svo loksins um tvö sofnar hann og er búinn að vera sofandi síðan (klukkutími). Ég veit ekki hvort ég ætti að prófa þetta aftur á morgun…. sé hvað hann sefur lengi núna.

Annars er fátt skemmtilegra hjá Daníel núna en að grípa í tásurnar og velta sér heilann hring, auðvitað í tveim lotum. Fengum svo Völu og Jökul í heimsókn í gær. Við mæðurnar lögðum strákana saman á leikteppið eftir að þeir voru vaknaðir og það er stysst frá því að segja að Daníel átti fótum sínum fjör að launa ef hann bara gæti labbað! Jökull var bara í því að toga og pota í Daníel þannig að það var varla óhætt að skilja þá saman eftir meðan að við mæðurnar hömuðumst í jólakortagerð. Ekki bætti úr að Daníel er dáldið viðkvæmur og grátgjarn þannig að um leið og hann fann að það var verið að brjóta eitthvað á sinn hlut þá var skeifan fljót að koma og ég auðvitað þurfti að hlaupa til til að hugga. Jæjja ég ætla að nýta þennan tíma meðan að strákurinn er sofandi og reyna að gera eitthvað hérna heima…. heyrðu, hann er VAKNAÐUR!