Leikskólastrákurinn

Loksins er Daníel byrjaður í leikskólanum Grøftekanten eða Grafarbakkanum eins og við foreldranir höfum íslenskað það. Nú er Daníel búinn að vera í viku á leikskólanum og við höfum ákveðið að hafa aðlögunina hæga þar sem við höfum bæði tíma í þetta og líka að hann skilur ekki málið. Hingað til hefur allt gengið rosalega vel og er hann núna frá 9-13 á leikskólanum og planið er að lengja þetta uppí 9-15 fyrir vikulokin. Leikskólinn er mjög fínn með góðum leikgarði og starfsfólkið er líka mjög indælt og vill allt fyrir okkur gera. Enn sem komið er eru kveðjustundirnar erfiðar en þegar við komum að sækja hann er hann á fullu í leik með hinum krökkunum og segir okkur síðan frá leikskóladvöl dagsins fram á kvöld. Hann hefur eignast tvo vini sem hann er mest með þó svo að þeir séu ekki deild með honum. Þessi nýju vinir hans heita Sebastian og Jakob og þegar við kíkjum á leikskólalóðina þá eru þeir ósjaldan að eltast við hvorn annan eða moka saman.

Við Einar eru himinlifandi yfir leikskóladvölinni og sjáum mikinn mun á Daníel. Ég get rétt ímyndað mér að það sé ekki gaman að hanga alltaf bara með mömmu á róló alla daga og þetta er einmitt það sem hann þurfti. Núna nýtum við líka mun betur þann tíma sem við höfum saman enda byrjaði Einar í sumarfríi sama dag og Daníel byrjaði á leikskólanum. Við vonum bara að þetta haldi áfram að ganga svona vel og hann verði kominn í fulla leikskóladvöl í næstu viku.

3 ára afmæli!

Daníel á afmæli í dag og er orðinn 3 ára! Því miður getum við víst ekki haldið alvöru barnaafmæli með fullt af börnum en við ákváðum bara að reyna að hafa sem skemmtilegastan dag í dag og fá svo Öglu og Ragga í afmæliskaffi á morgun. Þegar Daníel kom fram í morgun vorum við búin að raða upp pökkunum hans og fullt af blöðrum á sófanum. Hann fór strax að taka upp pakka og var mjög ánægður með gjafirnar sínar, sérstaklega var IKEA lestarsettið mjög spennandi. Síðan borðuðum við saman morgunmat í rólegheitunum og fengum smá kökur með. Eftir það fórum við í heimsókn á leikskólann hans Daníels sem hann byrjar á í júlí. Leikskólinn er beint á móti húsinu okkar og okkur leist öllum vel á hann, Daníel vildi helst bara vera þar áfram að leika. Síðan fór ég í skólann en Karen og Daníel fóru að baka og Daníel svo að leggja sig í hádeginu.
Þegar ég var búinn í skólanum um fjögur fór ég með lestinni og hitti Karen og Daníel í tívolí. Þar fékk Daníel að fara í bátana, hringekju, bíla og hoppa á stóru hoppudýnunni. Mikið fjör. Síðan fengum við okkur hamborgara á Burger King og komum okkur heim. Þar háttaði Daníel og svo horfðum við öll saman á Mjallhvíti og dvergana sjö, sem Daníel fanns SVAKALEGA fyndin! Fyrir háttinn lásum við svo fyrir hann eina af nýju bókunum sem hann fékk í afmælisgjöf. Daníel var mjög ánægður eftir daginn og fannst þetta bara fínasti afmælisdagur!
Við erum búin að setja inn nýjar myndir frá maí og júní, meðal annars deginum í dag, þær eru hérna. Annars erum við hætt að setja myndir inná þessa síðu, allar nýjar myndir koma núna inná http://einaregilsson.com/birketinget.

Finnst þér góð lykt af prumpi?

Daníel talar alveg endalaust (stundum of mikið!) og er með ýmsa góða frasa. Nokkrir af þeim hlutum sem hann segir:

“Finnst þér góð lykt af prumpi?”. Fyrst prumpar hann hressilega, svo spyr hann og springur svo úr hlátri! Og þetta hættir aldrei að vera fyndið!
“Ertu glaður?” og “Ertu pirr?”. Þegar hann er að tékka á því hvort við séum í góðu skapi. Stundum spyr hann aftur og aftur hvort maður sé glaður og maður þarf stanslaust að svara “já, ég er glaður. Já, pabbi er mjög glaður. Mjög glaður”. Og pirraður/pirruð heitir bara pirr.
Talar um sjálfan sig sem “þessi strákur” eða “strákurinn”. Dæmi: “Er pabbi mjög ánægður með þessi strákur?” og bendir á sjálfan sig. Eða “strákurinn er duglegur að taka til”.
“Þetta er ekki gott bull”. Sagt þegar ég var eitthvað að bulla í honum.
“Óþekkar pönnukökur” eru pönnukökur sem voru bakaðar heima hjá Öglu og festust saman á pönnunni. “Óþekkur pottur” var pottur sem sauð upp úr.

Annars er hann búinn að vera mikið á róló og legestue meðan við bíðum eftir að hann fái leikskólapláss. Legestue er svona hús með dóti þar sem foreldrar geta komið með börnin sín til að leika og hitta önnur börn, og er mjög gott einmitt meðan maður bíður eftir leikskóla. Hann fer yfirleitt þangað tvisvar í viku og svo á róló alla daga. Hann er líka orðinn aðeins ófeimnari við að byrja að tala við hin börnin og er alltaf mjög glaður þegar þau svara honum og kemur og segir okkur “Stelpan sagði hæ við mig”. Hann hefur líka sterkar skoðanir á mat, melóna var “besti matur í heimi” en þegar við spurðum hvort hún væri betri en hamborgari var svarið samt “neeeeeiiiiii”. Vonandi fer hann svo bráðum að komast inn á leikskóla, þá fer hann örugglega að koma með nokkra góða danska frasa hérna heima 🙂

Bananalagið

Daníel er búinn að vera mjög duglegur að syngja síðustu vikur og mánuði. Vinsælustu lögin eru Gulur, rauður, grænn og blár, Fyrr var oft í koti kátt og Hafið bláa hafið. En í dag gerðist sá merki atburður að Daníel samdi sitt fyrsta lag. Hann var búinn að vera að tala um bananalagið, sem hvorki ég né Karen könnuðumst við, svo við spurðum hann hver hefði kennt honum það. Þá svaraði hann “bara ég”. Þannig að þetta er frumsamið lag. Við báðum hann svo að syngja það og bananalagið er nokkurnveginn svona:

Banana banana banana banana banana banana banana banana banana Hvar ert þú?

Banana Banana banana banana banana banana banana banana banana banana Lagið!

Daníel í Danaveldi

Nú erum við búin að vera hérna í Danmörku í rúmar 3 vikur og erum að aðlagast alveg ágætlega. Maður finnur samt að Daníel saknar þess að vera ekki í kringum krakka eins og hann var á leikskólanum og horfir löngunaraugum á krakkana leika sér á leikskólanum fyrir framan húsið okkar. Hjá leikskólunum eru rosalega flott leiktæki en lóðin er læst um helgar þannig að við getum ekki stolist þarna þegar leikskólinn er lokaður. Það er erfitt að úskýra fyrir Daníel að við megum ekki leika okkur þarna og að mamma sé ekki með lykil að leikskólanum. Hann stakk meira að segja uppá því um daginn að við færum í búðina að kaupa lykil að leikskólanum 🙁
Daníel er líka orðinn dáldið mikill mömmustrákur þar sem við erum tvö saman allan daginn. Hann er líka orðinn rosalega duglegur í koppamálunum og ég slapp við að flytja með mér bleyjur milli landa. Hann er meira að segja orðinn svo duglegur að hann er farinn að fara sjálfur á koppinn og kallar bara á okkur þegar hann er búinn, meira að segja nr.2!
Ég held að í heildina litið sé þetta eins gott og á verður kosið. Nú er bara spurning hvenær hann kemst að í leikskólanum.

Ég á!

Ef mér finnst það flott, þá á ég það

Ef ég held á því, þá á ég það

Ef ég næ því frá þér, þá á ég það

Ef ég var með það rétt áðan, þá á ég það

Ef ég á það, má það á engan hátt líta út fyrir að vera þitt

Ef ég er að byggja eitthvað, þá á ég alla kubbana

EF það líkist dótinu mínu, þá á ég það

Þetta er mjög lýsandi fyrir Daníel þessa dagana þegar hann á samskipti við önnur börn. Hann getur á engann hátt komist hjá árekstrum af þessu tagi, meira að segja þegar hann er gestur hjá öðrum! Mér var hins vegar sagt í foreldraviðtalinu að vera ekkert að hafa áhyggjur að hann hann myndi verða að einhverjum eigingjörnum nýskupúka ( eins og ég greinileg ímyndaði mér), þetta er bara aldurinn. Ég er nú ekkert að stressa mig á þessu heldur á ég meira í erfiðleikum með að skella ekki uppúr við svona aðstæður því að horfa á alvarlega svipinn á honum þegar hann er að rífast um eitthvað dót sem hann hefur ekki snert í marga mánuði en sem er núna greinilega miðpunktur alheimsins er meira en lítið spaugilegt!

Snoooooze….

Daníel kom uppí rúm til mín í nótt eins og venjulega. Svo vekur útvarpsvekjaraklukkan okkur kl. 06:40 og ég snooza. Svo kveikir hún aftur á sér 10 mínútum seinna og þá teygir Daníel sig í klukkuna og snoozar! Ég var sem betur fer vakandi (annars hefði farið illa) og lít á hann, þá segir minn: Mamma og Daníel lúlla meira 😀 Litli kallinn! Hvað ætli komi næst? Ætli hann verði búinn að hita fyrir mig kaffi þegar ég vakna á morgun?

Nokkur video

Ég var að setja upp smá síðu með video-um af Daníel. Þetta er mest frá fyrsta árinu en kannski setjum við eitthvað meira inn fljótlega. Það er hægt að finna síðuna með því að smella á Video í valmyndinn hérna til hægri.

Leikskóli og fleira

Við erum nú að mestu leyti hætt að skrifa inná þessa síðu en ákvað að henda samt inn nokkrum punktum. Daníel byrjaði í aðlögun á leikskólanum Hamraborg í síðust viku. Hann náði 3 dögum í aðlögun áður en við fórum út og fer síðan í svona 2-3 í viðbót eftir að hann og Karen koma heim. Fyrstu 3 dagarnir voru svona:

Komum bara í heimsókn í klukkutíma. Töluðum við Nönnu aðstoðarleikskólastjóra sem var mjög fín. Daníel var síðan í svona hálftíma úti að leika með krökkunum og ég með, hann vildi helst vera lengur.
Komum kl. 8:30 og vorum í morgunmat með krökkunum. Daníel fékk hafragraut með smá Cheerios útí og var bara svona ágætlega sáttur. Svo var smá leikstund inni og svo rétt eftir 9 fór hann út með krökkunum. Þá skrapp ég í burtu og kom svo aftur um kl. 10:30. Þá var hann ennþá úti og bara hæstánægður.
Komum aftur kl. 8:30 í morgunmat. Daníel mjög ósáttur með morgunmatinn, vildi alls ekki borða og neitaði að sitja meðan hinir krakkarnir voru að borða. Mikill grátur og læti og fóstrurnar sögðu mér að fara bara með hann strax í leikherbergið. Eftir morgunmatinn fór ég svo aftur og kom svo til baka kl. 12, þá var Daníel búinn að borða hádegismat með krökkunum, borðaði vel og var í fínu skapi.

Á degi 4 ætti hann svo að vera framyfir hvíldartímann og á degi 5 að vera fram yfir síðdegishressinguna. Við sjáum til hvernig gengur þegar Karen kemur heim, hann þarf sennilega a.m.k. að taka dag 3 aftur þar sem hann verður búinn að vera í burtu í 2 vikur.

Aðrir punktar:

Allar hreyfingar eru orðnar miklu öruggari. Getur t.d. labbað upp stiga án þess að halda sér í (ef tröppurnar eru ekki mjög háar).
Talið er alltaf að aukast. Getur sagt setningar eins og ‘Ekki mamma tala Hönnu’. Vantar soldið uppá að hann fara að nota svona smáorð og samtengingar rétt.
Einn vinsælasti leikurinn er að láta mömmu og pabba kúra uppí rúmi og gera síðan krókódílaárás. Það gengur nokkurnveginn svona fyrir sig:
D: Mamma kúa. Mamma Pabbi kúa!
M & P: Já, við erum að kúra.
D: [stekkur oná okkur] KOKKALI!!!!! (Krókódíll)
M & P: ónei, enn ein krókódílaárás…
D: KOKKKALIIIII!!!!!!

Pissa í kopp

Stórtíðindi gerðust núna fyrir nokkrum dögum! Daníel pissaði í kopp í fyrsta sinn. Hann var búinn að vera að sýna koppnum áhuga, og var að tala um hann og var eitthvað hlaupandi um bleyjulaus. Síðan föttuðum við bara um kvöldið eftir að hann var farinn að sofa að það var komið piss í koppinn. Núna talar hann oft um að kúka í kopp, en reyndar gerir hann það yfirleitt þegar hann er búinn að kúka sem er frekar gagnslaust. En núna förum við að reyna að koma koppnum meira að.

Talið er líka alltaf að aukast. Við sáum ótrúlegan mun á honum eftir að hann var með okkur í 2 vikur í Búlgaríu. Þá var hann með okkur allan daginn og við alltaf að tala við hann og það hafði mikil áhrif. Nokkrar setningar sem eru vinsælar þessa dagana:

Meiri róló! (endurtekið alla leiðina heim af róló…)

Ekki heim! (Skotið inn á milli ‘meiri róló’)

Ekki koddu! (Þegar hann vill ekki að við eltum hann )

Ekki pabbi sitja! (Þegar ég sit í tölvunni eða horfandi á sjónvarpið)

Amma mín (við öll tækifæri, sérstaklega þegar á að syngja ‘Afi minn og amma mín’)

Pabbi gejaujju (Pabbi gleraugu)

Ekki Dajíe gejaujju (Ekki Daníel gleraugu. Daníel er mjög heillaður af gleraugum og hver er með þau og hver ekki)
Annars var fyrsti dagurinn hjá nýju barnapíunni í dag. Gekk bara nokkuð vel, Daníel reyndar fór ekkert að sofa í hádeginu og var loksins að sofna núna um 5 leytið, en það gengur vonandi betur í framhaldinu. Síðan kemst Daníel vonandi inná leikskóla í ágúst, hann kemst a.m.k í seinasta lagi í september inn.